ދިވެހި ރައްޔިތުން، ފުލުހުންގެ ފަރާތުން އެދެނީ، އެމީހަކީ ވަކި ފަންތިއެއްގެ މީހެއްތޯ ބެލުމެއްނެތި ހަމަހަމަ ކަމާއިއެކު، ޚިދުމަތްތައް ފޯރުކޮށްދިނުމަށް ކަމަށާ، ގާނޫނާއި ފުށުއަރާ ހިނދުގައި އޭނާއަކީ ދައުލަތުގެ ވަޒީރެއްތޯ، އޭނާއަކީ މަޖިލިސް މެންބަރެއްތޯ ބަލައިގެން ނުވާނެ ކަމަށް، ދާޚިލީ ސަލާމަތާއި ބެހޭ ވުޒާރާގެ ވަޒީރު ޢަލީ އިހްސާން ވިދާޅުވެއްޖެއެވެ.  

ފުލުހުންގެ ސްޓްރެޓެޖިކް އެކްޝަން ޕްލޭން އިފްތިތާޙް ކުރުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން ވަޒީރު ވިދާޅުވީ، ކުރިއަށް އޮތް ފަސް އަހަރުގެ، ފުލުހުންގެ އެކްޝަން ޕްލޭންގައި ހިމެނޭ މުހިންމު ކަންކަމުގެ ތެރޭގައި ތަފާތު ނުކޮށް ޚިދުނަތްތައް ފޯރުކޮށްދިނުން ހިމަނާފައިވާނެ ކަމަށެވެ.

އެހެންކަމުން، ތަފާތު ކުރުމެއްނެތި ރައްޔިތުންނަށް ޚިދުމަތްތައް ފޯރުކޮށްދިނުމުގެ ބާރު ދިވެހި ފުލުހުންނަށް ފުރިހަމައަށް ލިބިގެންވާ ކަމަށް އިހްސާން ވިދާޅުވުއެވެ.

މީގެ އިތުރުން ވަޒީރުގެ ވާހަކާގައި ވަނީ، ފުލުހުން ޓެކްނޮލިޖީގެ ބޭނުން ހިފުމާއި ގުޅޭގޮތުންވެސް އަލުއަޅުވާލައްވާފައެވެ. އެގޮތުން ޓެކްނޮލިޖީގެ ޚިދުމަތްތައް ފުލުހުންނަށް ފޯރުކޮށްދެވުފައުވާ ނަމަވެސް، އެ ޚިދުމަތުގެ ބޭނުން ފުރިހަމަ ގޮތުގައި ނުކުރެވޭކަން ފާހަގަކުރެއްވިއެވެ.

އަދި ޕޮލިސް އެޕްލިކޭޝަންގެ ނަމުގައި އެޕްލިކޭޝަނެއް ތަޢާރަފް ކޮށްފައިވާއިރު، އެއާއި ގުޅޭ ގޮތުން އާއްމު ރައްޔިތުން ހޭލުންތެރިކޮށް، އެ ބޭނުން ކޮށް، ފުލުހުންގެ މަސައްކަތްތައް ފަސޭހަކުރުމުގެ މަސައްކަތް ނުކުރެވޭކަން ފާހަގަކުރައްވައި ވަޒީރު ވަނީ ލިބިފައުވާ ޓެކްނޮލިޖީގެ ބޭނުން ފުރިހަމައަށް ކުރުމަށް ފުލުހުންގެ ފަރާތުން އެދުވަޑައުގެންފައެވެ.