އިސްރާއީލުގެ ރައްޔިތުން ރާއްޖެ އެތެރެވުން މަނާކުރުމަށް ސަރުކާރުން ނިންމުމުން، އެމެރިކާއިން ރާއްޖެ އަށް ދެމުންއަންނަ އެހީ ހުއްޓާލުމަށް ގޮވާލާ ބިލެއް އެގައުމުގެ ގާނޫނު ހަދާ މަޖިލީހަށް ހުށަހެޅުމަށް ނިންމައިފިއެވެ.

މި ބިލަކީ ޔަހޫދީ ޣައިރު ގާނޫނީ ދައުލަތް، އިސްރާއީލުގެ ރައްޔިތުން ރާއްޖެ އަށް އެތެރެވުން މަނާކުރުމަށް ސަރުކާރުން ނިންމި ނިންމުން ހުއްޓުވުމުގެ މަގްސަދުގައި އެ މަޖިލީހުގެ މެމްބަރު ޖޯޝް ގޮތެއިމާ ހުށަހަޅާ ބިލެކެވެ. އޭނާ އަކީ އެމެރިކާގެ މަޖިލީހުގައި އިސްރާއީލާއި އެއްކޮޅަށް އެންމެ ވަރުގަދަ އަށް ވަކާލާތު ކުރާ އެކަކެވެ. 

މި ބިލަށް "ޕްރޮޓެކްޓިން އެލައިޑް ޓްރެވަލް ހިޔަރ އެކްޓް (ޕާތު)" ނުވަތަ އެމެރިކާ އާއި ގާތް ގުޅުމެއް އޮންން ގައުމުތަކުގެ ރައްޔިތުންގެ ދަތުރުފަތުރުކުރުން ހިމާޔަތް ކުރުމުގެ ބިލް ގެ ނަމުން ނަންދިނުމަށް ނިންމާފައިވާކަމަށް އެމެރިކާގެ ނޫހެއް ކަމަށްވާ 'އެކްސިއޯސް' އިން ރިޕޯޓް ކުރެއެވެ.

މި ބިލުގައި ވާގޮތުން، ޔަހޫދީން ރާއްޖެ އެތެރެވުން މަނާކުރުމަށް ސަރުކާރުން ނިންމި ނިންމުން ރާއްޖެ އިން ބަދަލުކުރަންދެން އެމެރިކާ އިން ދޭ އެހީ ކަނޑާލަންޖެހޭނެއެވެ.

ބިލާއި ބެހޭ ގޮތުން ވާހަކަދައްކަމުން ޖޯޝް ގޮތެއިމާ ބުނީ، އިސްރާއީލުގެ ރައްޔިތުން އެތެރެވުން މަނާކޮށްފައިވާ ގައުމަކަށް އެގައުމުގެ  ޑޮލަރު ފޮނުވަން ނުޖެހޭނެކަމަށާއި، ރާއްޖެ އިން ނިންމި ނިންމުމަކީ ޔަހޫދީންނާއި މެދު އޮތް ނަފްރަތު ދައްކުވައިދޭ އަމަލެއް ކަމަށެވެ. އަދި ސަރުކާރުގެ މި ނިންމުން ބަދަލު ނުކުރާހާ ހިނދަކު އެމެރިކާގެ ޑޮލަރުގެ އެންމެ ސެންޓެއްހާ ހިސާބުވެސް ދެވިގެން ނުވާނެ ކަމަށް އޭނާ ބުންޏެވެ.

އިސްރާއީލުގެ ޕާސްޕޯޓުގައި ރާއްޖެ އެތެރެވުން މަނާކުރާނެކަން ސަރުކާރުން މި ހަފްތާގައި އިއުލާން ކުރުމާއިއެކު، ރާއްޖެ ވެގެން ގޮސްފައިވަނީ މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން ޔަހޫދީން ޣައްޒާގައި ހިންގަމުން އަންނަ ގަތުލުއާއްމާއި ގުޅިގެން އެގައުމުގެ ޕާސްޕޯޓް މަނާކުރާނެ ކަމަށް އިއުލާން ކުރި ފުރަތަމަ ގައުމަށެވެ.

ދިވެހި ސަރުކާރުގެ މި ނިންމުން ބޭރުގެ ދުނިޔޭގެ ފަލަ ސުރުޚީ ތަކަށް ވެސް އަރައި، އެތައް ބަޔަކު އަންނަނީ ސަރުކާރަށް ތާއީދުކޮށް ތައުރީފް ކުރަމުންނެވެ. އަދި މި ނިންމުމާއި ގުޅިގެން ގިނަ ބަޔަކު ވަނީ ރާއްޖެ އަށް ޗުއްޓީ ހޭދަކޮށްލަން އަންނަން ބޭނުންވާކަމަށް ބުނެ އެކަމުގެ ޝައުގުވެރިކަން ފާޅުކޮށްފައެވެ.