މީހުން ރަހީނުކުރުމަށް ފަހު ބަރަހަނާކޮށް އޮރިޔާން ކާޑު އުފައްދައިގެން، ބިރު ދައްކައި ފައިސާ ފޭރޭ ކަމުގެ ތުހުމަތުގައި ދެމަފިރިއަކު ބަންދުކޮށްފިއެވެ.
މެއި މަހުގެ 26 ވަނަ ދުވަހު މި ދެމީހުން ހައްޔަރު ކުރި އިރު، އޭރު މި ދެމީހުންގެ ތެރެއިން ފިރިހެންމީހާގެ ބަންދަށް 15 ދުވަސް އަދި އަންހެންމީހާގެ ބަންދަށް 10 ދުވަސް ވަނީ ޖަހާފައެވެ.
އޭގެ ފަހުން ކްރިމިނަލް ކޯޓުން އިއްޔެ ވަނީ އަންހެން މީހާގެ ބަންދުގެ މުއްދަތު އިތުރު 15 ދުވަހަށް އިތުރުކޮށްފައެވެ.
މި ދެމަފިރިންގެ މައްޗަށް ކުރާ ތުހުމަތުތަކަކީ ބިރު ދެއްކުން، ހުއްދަ ނޫން ގޮތެއްގައި މީހަކު ހިފެހެއްޓުން، އޮރިޔާން ކާޑު އުފެއްދުން، އަދި ފޭރުމެވެ.
މި މައްސަލައާއި ގުޅިގެން ނެރުނު ކޯޓް އަމުރުގައިވާގޮތުން މާލޭގެ ހެންވޭރުގައި ހުންނަ ގެއެއްގައި ދިރިއުޅޭ އަންހެން މީހާއަކީ 39 އަހަރުގެ އަންހެނެކެވެ. އަދި ފިރިހެން މީހާއަކީ 40 އަހަރުގެ މީހެކެވެ.
ކްރިމިނަލް ކޯޓުން ބުނީ، ބަންދުގައި ބެހެއްޓުމަށް އަމުރުކުރީ ބަންދުން ދޫކޮށްލައިފިނަމަ މައްސަލައިގައި ލިބެންހުރި ހެކިތަކަށް ބާރު ފޯރުވައި ނުފޫޒު ފޯރުވުމުގެ އިހުތިމާލު އޮތްކަމަށް ބެލެވޭތީ ކަމަށެވެ.
ފަހަކަށް އައިސް މީހުންނަށް އޮޅުވާލައިގެންނާއި އެކި ގޮތްގޮތުން ފޭރޭ މައްސަލަތައް ފެންމަތި ވެފައިވާއިރު، މި މަހުގެ 4 ވަނަ ދުވަހު ވެސް މި ފަދަ މައްސަލައެއްގައި ހުޅުމާލެ ދެވަނަ ފިޔަވަހިން ވަނީ ބަޔަކު ހައްޔަރުކޮށްފައެވެ.
Advertisement
This content is created and paid for by advertisers and does not involve Voice Journalists
