ސަރުކާރުން ހިލޭ ހައްޖަށް ފޮނުވާ 50 މީހުން މިއަދު ފުރާނެ ކަމަށް ހައްޖު ކޯޕަރޭޝަންގެ އެމްޑީ މުހައްމަދު ޝަކީލް ވިދާޅުވެއްޖެއެވެ.
ހައްޖުގެ އަޅުކަން އަދާކުރުމުގެ ކެރިފޯރުންތެރިކަން ލިބިފައިނުވާ 1،000 ރައްޔިތުން، އެމަނިކުފާނުގެ ޒައަމަތުގެ ފުރަތަމަ ފަސް އަހަރުގެ ތެރޭގައި، ސަރުކާރުގެ ހަރަދުގައި ޙައްޖަށް ފޮނުއްވައިދެއްވުމަކީ ރައީސް ޑރ.މުހައްމަދު މުއިއްޒުގެ ރިޔާސީ ވައުދެކެެވެ.
އެ ވައުދާ އެއްގޮތަށް ހައްޖުގެ އަޅުކަން އަދާކުރުމުގެ ކެރިފޯރުންތެރިކަން ލިބިފައިނުވާ ފުރަތަމަ 50 ޙައްޖުވެރީންގެ ގްރޫޕް ހައްޖު ކޯޕަރޭޝަންގެ ހަވާލުގައި 7 ޖޫން 2024 ވާ ހުކުރު ދުވަހު ޙައްޖުގެ މާތް އަޅުކަން އަދާކުރުމަށްޓަކާ މައްކާއަށް ދިއުމަށްޓަކާ ފުރާނެ ކަމަށް ޝަކީލް އެކްސްގައި ކުރެއްވި ޕޯސްޓެއްގައި ރޭ ވަނީ ވިދާޅުވެފައެވެ.
ރައީސްގެ ވައުދުފުޅުގެ ދަށުން ހައްޖަށް ފޮނުވާ މީހުން ކަނޑައަޅަނީ ފަގީރުންނާއި މިސްކީނުންގެ ދަފުތަރުގައި ރަޖިސްޓްރީކޮށްފައިވާ މީހުންގެ މެދުގައި ގުރުލައިގެންނެވެ.
ދައުލަތުގެ ހަރަދުގައި ހައްޖަށް ގެންދާ މީހުންނަށް އެތެރޭގެ ދަތުރުފަތުރުތަކުގެ ހަރަދާއި މާލޭގައި ހުރުމުގެ ހަރަދު ވެސް ހަމަޖައްސައިދެނީ ސަރުކާރުންނެވެ.
ފަގީރުންގެ ދަފުތަރުގައި އުމުރުން 50 އަހަރާއި 69 އަހަރާ ދެމެދުގެ 982 މީހުން ތިބިއިރު އޭގެ ތެރެއިން ޝަރުތު ހަމަވަނީ 667 މީހުންނެވެ.
Advertisement
This content is created and paid for by advertisers and does not involve Voice Journalists
