ކެންސަރު ފަރުވާއަށް ދަނޑުވެރިކަމާ ބެހޭ ވަޒީރު ޑރ. އައިޝަތު ރަމީލާ އެޑްމިޓްކޮށްފިއެވެ.

ވަޒީރު ރަމީލާ އެކްސްގައި ކުރެއްވި ޕޯސްޓެއްގައި ވިދާޅުވީ، އަނެއްކާވެސް އިތުރު ސާޖަރީއަކާއި ކީމޯތެރަޕީ އަދި އިމިއުނޯތެރަޕީއަށް ހޮސްޕިޓަލުގައި އެޑްމިޓް ކޮށްފައިވާ ކަމަށެވެ.

އަދި ކެންސަރުބަލި ތަހައްމަލް ކުރައްވަމުންދާ މި ދަތުރުގައި، ދިރިއުޅުމުގައި ދިމާވަމުންދާ އެކިއެކި ގޮންޖެހުންތަކާއި ކުރިމަތިލެއްވުމަށް ލިބިލައްވާ ހިތްވަރާއި، މާތް الله ދެއްވާފައިވާ ނިޢުމަތްތަކަށް ޝުކުރު ކުރައްވާ ކަމަށްވެސް ވަޒީރު ވިދާޅުވިއެވެ. 

Advertisement

ކެންސަރު ބައްޔަށް ފަރުވާ ހޯއްދެވުމަށް ވަޒީރު ވަނީ މިދިޔަ ނޮވެމްބަރު މަހުގެ 23 ވަނަ ދުވަހުވެސް ރާއްޖޭން ބޭރަށް ފުރާވަޑައިގަތެވެ. ފަރުވާއަށް ފަހު ރާއްޖެ ވަޑައިގެންނެވީ ފެބްރުއަރީ މަހުގެ ހަތަރުވަނަ ދުވަހުގައެވެ.

އެދުވަހު ކުރެއްވި ޕޯސްޓެއްގައި ވަޒީރު ރަމީލާ ވިދާޅުވީ ބަލި މިހާރު ހުރީ އެޑްވާންސް ސްޓޭޖުގައި ކަމަށާއި، ކީމޯ ތެރަޕީގެ 9 ސެޝަން މިހާރު ނިމިފައިވާ ކަމަށެވެ. އަދި ފަރުވާގެ ދެވަނަ ފޭސް ފެށުމުގެ ކުރިން ރާއްޖޭގައި ހޭދަކުރަން ލިބޭ ދުވަސްތަކުގެ ބޭނުން އެންމެ ފުރިހަމަގޮތުގައި ހިފުމަށް އުއްމީދުކުރައްވާ ކަމަށް ވެސް އެކަމަނާ ވިދާޅުވިއެވެ. 

ވަޒީރު ރަމީލާ ގެންދަވަނީ މެޓަސްޓޭޓިކް ސީރަސް ޕެޕިލަރީ ކާސިނޯމާ ކެންސަރަށެވެ. މެޓަސްޓޭޓިކް ކެންސަރަކީ ހަށިގަނޑުގެ އެއް ގުނަވަނުން އަނެއް ގުނަވަނަށް ފެތުރޭ ކެންސަރެކެވެ. 

ވަޒީރު ރަމީލާ އަކީ މި ސަރުކާރުގެ ކެބިނެޓްގައި ހިމެނިވަޑައިގަންނަވާ މަދު އަންހެން ބޭފުޅުންގެ ތެރެއިން އެއް ބޭފުޅެކެވެ.

ޑރ. ޢާއިޝަތު ރަމީލާ ވަނީ މީގެކުރިން މިނިސްޓަރ އޮފް ސްޓޭޓް ފޮރ ހެލްތުގެ މަގާމާ، މިނިސްޓަރ އޮފް ސްޓޭޓް ފޮރ ހެލްތު އެންޑް އެންޑް ފެމެލީގެ މަގާމުވެސް އަދާކުރައްވާފައެވެ. ދިވެހި ސަރުކާރުގެ ޚިދުމަތް ފެށްޓެވީ ނަރުހެއްގެ ވަޒީފާއިން 1990 ވަނަ އަހަރުއެވެ. ވަޒީރު ޕީއެޗްޑީ ހާސިލް ކުރެއްވީ 2010 ވަނަ އަހަރު ސޯޝަލް ސައިންސްގެ ދާއިރާއިންނެވެ.