ޣައްޒާގެ މައުޞޫމް ކުޑަކުދިންނާއި މެދު ހިންގާ ލާއިންސާނީ އަމަލުތަކުގެ ސަބަބުން ޔަހޫދީންގެ ޣައިރު ގާނޫނީ ދައުލަތް، އިސްރާއީލް އދ ގައި ބްލެކް ލިސްޓްކޮށްފިއެވެ.

މި ލިސްޓަކީ ދުނިޔޭގައި ހިނގާ އެކި ހަމަނުޖެހުން ތަކުގައި ކުޑަކުދިންގެ ހައްގުތަކަށް އަރައިގަނެ، އެ ކުދިންނަށް އަނިޔާވެރިވާ ގައުމުތައް ހިމެނޭ ލިސްޓެކެވެ.

މި ލިސްޓަށް އިސްރާއީލު އިތުރުކުރުމަށް އދ ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ނިންމެވީ، ޔަހޫދީ ފައުޖުން ޣައްޒާގައި ހިންގަމުންދާ ގަތުލުއާއްމުގައި ކުޑަކުދިންގެ ހައްގުތަކަށް އަރައިގަނެ، ގާނޫނާއި ޚިލާފު އެތައް އަމަލުތަކެއް ހިންގާފައިވާތީއެވެ. މިއީ ދުނިޔޭގައި ހިނގާ ހަމަނުޖެހުންތަކާއި ގުޅިގެން އަހަރަކު އެއްފަހަރު ނެރޭ "ކުޑަކުދިންނާއި ހަތިޔާރު އެޅި ހަމަނުޖެހުން" ރިޕޯޓުގައި ހިމަނާ، އދ ގެ ސަލާމަތީ މަޖިލީހަށް ހުށަހެޅޭ ލިސްޓެކެވެ.

ގުޓަރެސް ގެ މި ނިންމުން ބަދަލު ކުރުމަށް އިސްރާއީލުން ބާރުއެޅިނަމަވެސް، އެ ނިންމުން ބަދަލު ނުކުރާނެކަން ގުޓަރެސް ހާމަކޮށްފައިވާއިރު، މި މަހުގެ 14 ގައި ލިސްޓް އދ ގެ ސަލާމަތީ މަޖިލީހަށް ހުށަހެޅުމަށްފަހު، މި މަހުގެ ތެރޭގައި އާއްމު ކުރާނެއެވެ.

މިއާއިއެކު، އިސްރާއީލުން އދ އަށް ކަނޑައަޅާފައި ހުންނަ މަންދޫބު ގިލާޑް އެރްދާން ވަނީ މިއީ ހަމާސް އަށް ބާރުލިބޭނެ ކަމެއް ކަމަށާއި، މިއަދު ބްލެކްލިސްޓްވީ އިސްރާއީލު ނޫން ކަމަށާއި، އެއީ ޚުދު އދ ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ކަމަށް ވެސް ބުނެފައެވެ.

މިކަމަށް ރައްދުދެއްވަމުން ގުޓަރެސްގެ ތަރުޖަމާނު ސްޓެފަން ޑޫޖަރިކް ވިދާޅުވީ، އިސްރާއީލުގެ މަންދޫބުގެ މި ވާހަކަތަކަކީ އދ ގެ ހިދުމަތުގައި އޭނާ ހުރި 24 އަހަރުގެ ތެރޭގައި ވެސް އދ ގެ މަންދޫބަކު ދައްކާފައިވާ ވާހަކަތަކެއް ނޫންކަމަށާއި، އެ ވާހަކަތައް ހަރުކަށި އިބާރާތުން ކުށްވެރިކުރާކަމަށެވެ.

މި ލިސްޓުގައި އިސްރާއީލު ހިމެނުމަށް އެކި އެކި ހައްގުތަކާ ބެހޭ ޖަމާއަތްތަކުން ބާރުއަޅާފައިވާއިރު، މީގެ ކުރިން 2022 ވަނަ އަހަރު ވެސް އިސްރާއީލުން ކުރިއެރުންތައް ނުދައްކާނަމަ، ހަމަނުޖެހުންތަކުން ކުޑަކުދިން ރައްކާތެރިކުރުމަށް އެކަށީގެންވާ ފިޔަވަޅުތައް ނާޅާ ގައުމުތަކުގެ ލިސްޓުގައި ހިމަނާނެ ކަމަށް ބުނެ އދ އިން ވަނީ އިންޒާރުވެސް ނެރެފައެވެ.

އިސްރާއީލުގެ އިތުރުން ފަލަސްތީނުގެ ހައްގުގައި ހަނގުރާމަ ކުރަމުންދާ ހަމާސް ޖަމާއަތް ވެސް ވަނީ މި ލިސްޓްގައި ހިމަނާފައެވެ.

ޔަހޫދީ ފައުޖުން މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ޣައްޒާގައި ހިންގަމުން އަންނަ ގަތުލުއާއްމާއި ގުޅިގެން މިހާތަނަށް 15,571 ކުޑަކުދިން ވަނީ ޝަހީދުކޮށްލާފައެވެ.