އިންޑިއާގެ ބޮޑުވަޒީރު ކަމުގެ ތިން ވަނަ ދައުރެއް ކަށަވަރުކުރެއްވި ނަރެންދްރަ މޯދީ ހުވާކުރާ ރަސްމިއްޔާތަށް ދިން ދައުވަތު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ގަބޫލުފުޅު ކުރައްވައިފިއެވެ.
ރައީސް އޮފީހުން ބުނީ، މި ދައުވަތު ރައީސް ޑރ.މުޢިއްޒަށް އަރުވާފައިވަނީ އިންޑިއާއިން ރާއްޖެ އަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު ރައީސް ޑރ.މުޢިއްޒުގެ އަރިހަށް ކުރެއްވި އިހުތިރާމްގެ ޒިޔާރަތެއްގައިކަމަށެވެ.
މި ބައްދަލުވުމުގައި އިންޑިއާގެ ސަފީރު ވަނީ އިންޑިއާގެ ބޮޑު ވަޒިރުކަމަށް މޯދީ ހުވާ ކުރާ ރަސްމިއްޔާތުގައި ރައީސް ޑރ.މުޢިއްޒު ބައިވެރިވެވަޑައިގެންދެއްވުމަކީ މޯދީ އެދިލައްވާ ކަމެއް ކަމަށް ވިދާޅުވެފައެވެ.
މި ދައުވަތަށް ޝުކުރު އަދާކުރައްވަމުން ރައީސް ޑރ.މުޢިއްޒު ވިދާޅުވީ، މި ފަދަ ތާރީޚީ ހަފްލާއެއްގައި ބައިވެރިވުމަށް ދައުވަތު ލިބުމަކީ ލިބިވަޑައިގެން ޝަރަފެއް ކަމަށާއި، ދެ ގައުމުގެ ދެމެދުގައިވާ ގުޅުން އިތުރަށް ބަދަހި ވަމުންދާކަމަށެވެ.
އިންޑިއާގެ ބޮޑުވަޒީރު ކަމުގެ މަގާމަށް މޯދީ ތިންވަނަ ފަހަރަށް އިންތިޚާބުވުމާއި ގުޅިގެން ރައީސް ޑރ.މުޢިއްޒު ވަނީ މަރުހަބާ ވިދާޅުވެ، ދެ ގައުމުގެ ވެސް މަސްލަހަތުތައް ކުރިއެރުވުމަށް ޓަކައި އެކުގައި މަސައްކަތް ކުރެއްވުމަށް ތައްޔާރަށް ހުންނެވި ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
