އިންޑިއާގެ ބޮޑުވަޒީރު ކަމަށް ތިން ވަނަ ފަހަރަށް އިންތިޚާބުވި ނަރެންދްރަ މޯދީގެ ހުވާ ކުރުމުގެ ރަސްމިއްޔާތަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވަޑައިގަންނަވާތީ، އެމަނިކުފާނަށް ހޫނު މަރުހަބާއެއް ދެންނެވުމަށް އިންޑިއާއިން ތައްޔާރީތައް ވާން ފަށައިފިއެވެ.

އެގޮތުން ރައީސް ޑރ.މުޢިއްޒު އަށް މަރުހަބާ ކިޔުމަށްޓަކައި އެގައުމުގެ ޚާރިޖީ ވުޒާރާގެ ކުރިމަތީގައި އިންޑިއާގެ ބޮޑުވަޒީރު މޯދީ އާއި ރައީސް ޑރ.މުޢިއްޒު ގެ ފޮޓޯ އެކުލެވޭ ބެނާ އެއް ވެސް ވަނީ ހަރުކޮށްފައެވެ.

މި ރަސްމިއްޔާތަށް ވަޑައިގަތުމަށް ރައީސް ޑރ.މުޢިއްޒު އަށް ދައުވަތުލިބިފައިވާއިރު، އެމަނިކުފާނު ވަނީ މި ދައުވަތު ގަބޫލުފުޅު ކުރައްވާފައެވެ.

Advertisement

މި ދައުވަތަށް ޝުކުރު އަދާކުރައްވަމުން ރައީސް ޑރ.މުޢިއްޒު ވިދާޅުވީ، މި ފަދަ ތާރީޚީ ހަފްލާއެއްގައި ބައިވެރިވުމަށް ދައުވަތު ލިބުމަކީ ލިބިވަޑައިގެން ޝަރަފެއް ކަމަށާއި، ދެ ގައުމުގެ ދެމެދުގައިވާ ގުޅުން އިތުރަށް ބަދަހި ވަމުންދާކަމަށެވެ.

އިންޑިއާގެ ބޮޑުވަޒީރު ކަމުގެ މަގާމަށް މޯދީ ތިންވަނަ ފަހަރަށް އިންތިޚާބުވުމާއި ގުޅިގެން ރައީސް ޑރ.މުޢިއްޒު ވަނީ މަރުހަބާ ވިދާޅުވެ، ދެ ގައުމުގެ ވެސް މަސްލަހަތުތައް ކުރިއެރުވުމަށް ޓަކައި އެކުގައި މަސައްކަތް ކުރެއްވުމަށް ތައްޔާރަށް ހުންނެވި ކަމަށް ވިދާޅުވެފައެވެ

ރައީސް ޑރ.މުޢިއްޒުގެ އިތުރުން ވެސް މޯދީ ހުވާކުރުމުގެ ރަސްމިއްޔާތަށް ވަޑައިގަންނަވާ އަވައްޓެރި ގައުމުތަކުގެ ވެރިންނަށް މަރުހަބާ ކިޔުމަށްޓަކައި އިންޑިއާއިން ތައްޔާރީތައް ވަމުން އަންނަ ކަމަށް އެގައުމުގެ ނޫސްތަކުން ރިޕޯޓްކުރެއެވެ.