ނެރެމުންދާ ނަތީޖާތަކަށް ބަލާއިރު، މިވަގުތު ދުނިޔޭގައި އޮތް އެންމެ މޮޅު ޓީމަކީ ރެއާލް މެޑްރިޑް ކަމަށް، އާޖެންޓީނާގެ ކެޕްޓަން ލިއޮނަލް މެސީ ބުނެފި އެވެ.

ރެއާލް މެޑްރިޑްގެ ޒަމާންވީ އެންމެ ބޮޑު ވާދަވެރިއާ، ބާސެލޯނާގެ ކުރީގެ ކެޕްޓަން މިހެން ބުނީ އެމެރިކާގެ ނޫހަކަށް ދިން އިންޓަވިއުއެއްގަ އެވެ. އަދި މިހާރު އެމެރިކާގެ އިންޓަ މިޔާމީއަށް ކުޅެމުން އަންނަ އުމުރުން 36 އަހަރުގެ ފޯވާޑް ފްލޮރިޑާގެ ނޫހެއް ކަމަށްވާ އިންފޮބެއިއަށް ދިން . އިންޓަވިއުގައި ނޫސްވެރިއާ ކުރި ސުވާލަކަށް ޖަވާބު ދެމުން މެސީ ބުނީ އޭނާ ދެކޭ ގޮތުގައި އެންމެ މޮޅު ޓީމަކީ ސްޕެއިންގެ ޗެމްޕިއަން ރެއާލް މެޑްރިޑް ކަމަށެވެ. 

"ރެއާލްއަކީ ދުނިޔޭގެ އެންމެ މޮޅު ޓީމު މިވަގުތު، މިފަހަރުގެ ޗެމްޕިއަންސް ލީގު ވެސް ކާމިޔާބުކުރީ  އެ ޓީމު. ނަތީޖާތަކަށް ބަލާނަމަ އެންމެ މޮޅު ޓީމަކީ ހަމަ ރެއާލް." މި ނިމުނު ސީޒަންގެ ސްޕެނިޝް ލީގާއި ސުޕަ ކަޕް ވެސް ކާމިޔާބުކުރި ރެއާލްއާ ބެހޭގޮތުން މެސީ ބުންޏެވެ.

Advertisement

މީގެއިތުރުން މެސީ ބުނި ގޮތުގައި ކުޅުމުގެ ވައްޓަފާޅި އާއި ފެންވަރަށް ބަލާއިރު އެންމެ މޮޅު ޓީމަކީ މެންޗެސްޓާ ސިޓީ ކަމަށެވެ. އެގޮތުން ސިޓީގެ ކޯޗު ޕެޕް ގާޑިއޯލާ އެ ޓީމު ލައްވާ ކުޅުއްވާ ގޮތާމެދު މެސީ ވަނީ ގާޑިއޯލާއަށް ތައުރީފުކޮށްފަ އެވެ.

އާޖެންޓީނާގެ ކެޕްޓަން މެސީ ރެއާލް މެޑްރިޑަށް ތައުރީފުކޮށް ވާހަކަ ދައްކާފައިވައިރު، އޭނާގެ ކެރިއަރުގެ އެންމެ ކާމިޔާބު ދުވަސްތައް ހޭދަކޮށްފައިވަނީ ރެއާލް މެޑްރިޑާއި އެންމެ ވާދަވެރި ބާސެލޯނާގައެވެ. އެގޮތުން އެޓީމައެކު މެސީ 17 ސީޒަން ހޭދަކޮށް ގިނަ ކާމިޔާބީތަކެއް ހާސިލްކޮށްފައިާއިރު، މިހާތަނަށް ރެއާލް މެޑްރިޑް ކޮޅަށް އެންމެ ގިނަ ލަނޑު ޖަހާފައިވާ ކުޅުންތެރިއަކީ ވެސް މެސީކަން ފާހަގަކޮށްލެވެ އެވެ.