ޣައްޒާގެ މެދުތެރޭގައި ހުރި ކޭމްޕަކަށް ޔަހޫދީން ދިން ހަމަލާތަކެއްގައި 210 މީހުން ޝަހީދުކޮށްލައިފިއެވެ.

ހަމާސް އިން ނެރުނު ބަޔާނެއްގައި ބުނީ، މި ހަމަލާތަކުގައި 210 މީހުން ޝަހީދުވެފައިވާއިރު، 400 އަށް ވުރެ ގިނަ މީހުން ޒަހަމްވެފައިވާކަމަށެވެ.

ހައްދުފަހަނަ އަޅާފައިވާ އިސްރާއީލުގެ ސިފައިން ޣައްޒާގެ މެދުތެރެއަށް ވައިގެ މަގުންނާއި އެއްގަމު މަގުން ވަރުގަދަ ހަމަލާތަކެއް ވަނީ ދީފައެވެ. މިހަމަލާތަކާއި ގުޅިގެން ޣައްޒާގެ ހެލްތު މިނިސްޓްރީން ބުނީ، އަލް ނޫސެއިރާތަށް ޔަހޫދީ ސިފައިން ދިން ހަމަލާތަކާއި ގުޅިގެން ގިނަ އަދަދަކަށް ކުޑަކުދިންނާއި އަންހެނުންނަށް ޒަހަމްވެ، ޝަހީދުވެފައިވާކަމަށެވެ. 

"ރޮއިޓާސް" އިން ރިޕޯޓްކުރި ގޮތުގައި މިހަމަލާތައް އަމާޒުކޮށްފައިވަނީ ޣައްޒާގެ މެދުތެރޭގައި ހުރި މާކެޓަކަށާއި، އަލްއައުދާ މިސްކިތަށެވެ.

ފާހަގަކޮށްލެވޭ ގޮތުގައި އަލް ނޫސެއިރާތަކީ ޣައްޒާގައި ޔަހޫދީން ހިންގަމުންދާ ގަތުލުއާއްމުގެ ސަބަބުން ގިނަ ދުވަސްތަކެއް ވަންދެން އެތައް ބަޔަކު ބޯހިޔާވަހިކަން ހޯދަމުން އަންނަ ސަރަހައްދެކެވެ. މި ސަރަހައްދަށް ޔަހޫދީ ސިފައިން އަރައި، ލާއިންސާނީ އެތަކެއް އަމަލުތަކެއް ހިންގާފައިވަނީ ހަމާސްގެ ބެލުމުގެ ދަށުގައި ތިބި ޔަހޫދީންތައް ސަލާމަތްކުރުމަށް ކަމަށް ބުނެއެވެ.