އިންޑިއާ އަބަދުވެސް ވާނީ ރާއްޖެ އާއި އެންމެ ގާތް ގުޅުމެއް އޮންނަ ގައުމަށްކަމަށް ޚާރިޖީ ވަޒީރު މޫސާ ޒަމީރު ވިދާޅުވެއްޖެއެވެ.
އިންޑިއާގެ ބޮޑުވަޒީރު ކަމަށް ނަރެންދްރަ މޯދީ ތިންވަނަ ފަހަރަށް ހުވާ ކުރައްވާ ރަސްމިއްޔާތަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އަރިހުގައި މިހާރު އިންޑިއާއަށް ކުރައްވަމުންގެންދަވާ ދަތުރުފުޅުގައި ސްޓްރެޓްނިއުސް ގްލޯބަލް އަށް ދެއްވި ބަސްދީގަތުމެއްގައި ވަޒީރު ޒަމީރު ވިދާޅުވީ، މޯދީ އާ ދައުރަކަށް ހުވާ ކުރެއްވުމުގެ ރަސްމިއްޔާތަކީ ވަރަށް ތާރީޚީ ރަސްމިއްޔާތެއް ކަމަށާއި މި ރަސްމިއްޔާތުގައި ބައިވެރިވެވަޑައިގަތުމަކީ ޝަރަފެއް ކަމަށް ރައީސް ޑރ.މުޢިއްޒު ދެކެވަޑައިގަންނަވާ ކަަމަށެވެ.
"މި ތާރީޚީ ރަސްމިއްޔާތުގައި ބައިވެރިވެ ވަޑައިގަތުމަކީ ރައީސް ދެކެވަޑައިގަންނަވާ ގޮތުގައި ލިބިވަޑައިގަންނަވާ ބޮޑު ޝަރަފެއް."
ވަޒީރު ޒަމީރު ވިދާޅުވިއެވެ.
މޯދީ އާއި އެކު ރާއްޖެ އާއި އިންޑިއާގެ ގުޅުން އިތުރަށް ބަދަހި ކުރުމަށް ރައީސް ޑރ.މުޢިއްޒު ބޭނުންފުޅުވެއްލައްވާ ކަމަށާއި، ރައީސް ޑރ.މުޢިއްޒު ދިއްލީ އަށް ވަޑައިގަތުމަކީ ވެސް ދެގައުމުގެ ދެމެދުގައި އޮތް ގުޅުމަށް ދެއްވާ އަހަންމިޔަތުކަން ހާމަވާކަމެއް ކަމަށް ވެސް ވަޒީރު ވިދާޅުވިއެވެ.
މީގެ އިތުރުންވެސް ވަޒީރު ވިދާޅުވީ، މި ދަތުރުފުޅުގެ ސަބަބުން އިންޑިއާ އާއި ރާއްޖެ އާއި ދެމެދު އޮތް ގުޅުން އިތުރަށް ބަދަހިވެގެންދާނެ ކަމަށް އުންމީދު ކުރައްވާ ކަމަށެވެ.
Advertisement
This content is created and paid for by advertisers and does not involve Voice Journalists
