ޔޫރޯއަށް ތައްޔާރުވުމުގެ ގޮތުން އަންގާރަ ދުވަހުގެ ރޭ ރިޕަބްލިކް އޮފް އަޔަލެންޑާއި ދެކޮޅަށް ކުޅެ 3-0 ގެ ނަތީޖާއަކުން ޕޯޗުގަލް ކާމިޔާބުކުރި މެޗުގައި ކާމިޔާބުކުރި ދެލަނޑާއެކު ބައިނަލްއަގުވާމީ ފުޓްބޯޅައިގައި އިތުރު ތިން ރެކޯޑެއް ރޮނާލްޑޯ ހާސިލްކޮށްފިއެވެ.

ޕޯޗުގަލް އެންމެ ފަހުން ކުޅުނު މެޗުގައި ކްރޮއޭޝިއާ އަތުން 2-1 ގެ ނަތީޖާއަކުން އެޓީމު ބަލިވެފައިވާއިރު، އެމެޗުގައި ކެޕްޓަން ކްރިސްޓިއާނޯ ރޮނާލްޑޯގެ އިތުރުން ތަޖުރިބާކާރު ޑިފެންޑަރު ޕެޕޭ ކުޅެފައެއް ނުވެއެވެ. ނަމަވެސް އަޔަލެންޑާއި ދެކޮޅަށް ކުޅުނު މެޗުގެ ފުރަތަމަ 11 ގައި ކޯޗު ރޮބާޓޯ މާޓިނޭޒް ވަނީ މިދެކުޅުންތެރިން ވެސް ހިމަނާފައެވެ.

މިމެޗުގައި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ދެލަނޑު ކާމިޔާބުކުރިއިރު، އެޓީމުގެ އަނެއް ލަނޑު ކާމިޔާބުކޮށްދިނީ ފޯވާޑް ޖޮއާއު ފެލިކްސް އެވެ. މީގެއިތުރުން މިމެޗުގައި ރޮނާލްޑޯ ކާމިޔާބުކުރި ދެލަނޑާއެކު ގައުމީ ޓީމަށް ކުޅުނު 207 މެޗުގައި ރޮނާލްޑޯ ކާމިޔާބުކުރި ލަނޑުގެ އަދަދު ވަނީ 130 އަށް އަރާފައެވެ. މިރެކޯޑުގެ އިތުރުން މިމެޗުގައި ކާމިޔާބުކުރި ދެލަނޑާއެކު ރޮނާލްޑޯގެ ފުޓްބޯޅަ ކެރިއަރުގައި ކާމިޔާބުކުރި ލަނޑުގެ އަދަދު ވަނީ 895 އަށް އަރާފައެވެ.

މީގެ އިތުރުން މިމެޗުގައި ރޮނާލްޑޯ ހާސިލްކުރި އަނެއް ރެކޯޑަކީ ގައުމީ ޓީމަށް ޖެހިޖެހިން 21 އަހަރު ލަނޑުޖެހި ފުރަތަމަ ކުޅުންތެރިއާގެ ރެކޯޑެވެ. ރޮނާލްޑޯ ވަނީ 2004 ވަނަ އަހަރުން ފެށިގެން 2024 ވަނަ އަހަރާއި ހަމައަށް ކޮންމެ އަހަރަކުވެސް މަދުވެގެން އެއްލަނޑު ޕޯޗުގަލް ގައުމީ ޓީމަށް ކާމިޔާބުކޮށްދީފައެވެ.

ބުރާސްފަތި ދުވަހު ޖަރުމަނުގައި ފަށާ ޔޫރޯގައި ޕޯޗުގަލް ހިމެނުނީ ޗެކް ރިޕަބްލިކް، ޖޯޖިއާ އަދި ތުރުކީއާއެކު ގުރޫޕް އެފްގައެވެ. އަދި މުބާރާތުގައި ޕޯޗުގަލްގެ ފުރަތަމަ މެޗުގައި މިމަހުގެ 19 ވަނަ ދުވަހުގެ ރޭ އެޓީމުން ނުކުންނާނީ ޗެކް ރިޕަބްލިކާއި ދެކޮޅަށެވެ