ހޮލިޑޭ ސްޕޯޓްސް ކުލަބުގެ ފަރާތުން އިންތިޒާމް ކޮށްގެން މާލެ ސިޓީގައި ބާއްވާ 'ރ.އަތޮޅު ފުޓްސަލް ޗެލެންޖް 2024' ގައި ބައިވެރިވުމުގެ ފުރުސަތު ހުޅުވާލައިފިއެވެ.

މުބާރާތް އިންތިޒާމު ކުރުމުގައި އިސްކޮށް ހަރަކާތްތެރިވާ އޮފިޝަލަކު ވޮއިސް ސްޕޯޓްސްއަށް މައުލުމާތު ދެމުން ބުނީ މިމުބާރާތަކީ މާލޭގައި ދިރިއުޅޭ ދުވާފަރުގެ ޒުވާނުންތަކެއްގެ އިސްނެގުމާއެކު ހޮލިޑޭ ސްޕޯޓްސް ކުލަބާއި ގުޅިގެން ބާއްވާ މުބާރާތެއްކަމަށެވެ.

މުބާރާތް ހުޅުވާލާފައި ވަނީ ރ.އަތޮޅުގެ ކުލަބު ޖަމުއިއްޔާތަކަށް، އަދި ބޭނުންވަނީ މިއަތޮޅުގެ ވީހާވެސް ގިނަ ރަށްތަކަކުން ޓީމުތައް ބައިވެރިވުން. އަޅުގަނޑުމެން މިބަލަނީ މަދުވެގެން 12 ޓީމު ނުވަތަ ގިނަވެގެން 16 ޓީމާއެކު މުބާރާތް ކުރިއަށް ގެންދިއުމަށް. 

މިފަދަ މުބާރާތެއް މާލޭގެގައި ބޭއްވުމުގެ މަގުސަދަކީ ރ.އަތޮޅުގައި ތިބި ޒުވާން ކުޅުންތެރިންނަށް އެމީހުންގެ ހުނަރު ގިނަބައެއްގެ ކުރިމަތީގައި ދައްކާލުމުގެ ފުރުސަތު ހޯދައިދިނުން. މީގެ އިތުރުން ގޯލްޑަން ފުޓްސަލް ޗެލެންޖު ކަހަލަ ބޮޑެތި ފުޓްސަލް މުބާރާތްތަކުގައި ވާދަކުރާ ކުޅުންތެރިންނަށް މިމާހައުލުގައި އިތުރު ތަޖުރިބާތަކެއް ކުރުމުގެ ފުރުސަތު ހޯދައިދިނުމެވެ.

5 ޖުލައި 2024 ގައި ފެށުމަށް ތައްޔާރުވަމުން އަންނަ މިމުބާރާތުގައި ބައިވެރިވުމުގެ ފުރުސަތު ހުޅުވާލާފައި ވަނީ 20 ޖޫން 2024 ވަނަ ދުވަހުގެ ނިޔަލަށެވެ.