މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ހުއްޓުމެއްނެތި ޔަހޫދީން ޣައްޒާ އަށް ދެމުންއަންނަ ލާއިންސާނީ ހަމަލާތަކަށް 249 ދުވަސް ވެފައިވާއިރު، އެ ހަމަލާތަކުގައި ޝަހީދުވި މީހުންގެ އަދަދު 37,164 އަށް އަރައިފިއެވެ.

މިދިޔަ އަހަރު ޔަހޫދީ ފައުޖުން ޣައްޒާ އަށް ދޭންފެށި މި ހަމަލާތަކުގައި މިހާތަނަށް 84,832 މީހުން ޒަހަމްވެފައިވާއިރު، ޣައްޒާގެ ހެލްތު މިނިސްޓްރީން ބުނީ ޔަހޫދީން ހަމަލާތަކުގައި ފާއިތުވި 24 ގަޑިއިރު ތެރޭގައި އެކަނިވެސް 40 މީހަކު ޝަހީދުކޮށްލާފައިވާ ކަމަށެވެ.

މިނިސްޓްރީން ފާހަގަކޮށްފައިވާ ގޮތުގައި، ކެނޑިނޭޅި ޔަހޫދީން ދެމުން އަންނަ ބޮމުގެ ހަމަލާތަކުގެ ސަބަބުން އިމާރާތްތައް ބިމާއި ހަމަވުމުގެ އިތުރުން، މީހުން ސަލާމަތްކުރުމަށް އެހީވާ މީހުން މަދުވުމުގެ ސަބަބުން އިމާރާތްތަކާއި އެނޫންވެސް އެފަދަ ތަންތަނުގެ ދަށުގައި ނުފެނި ތާށިވެ، ގެއްލިފައިވާ މީހުންގެ އަދަދު 10،000 އަށް އަރާފައިވާ ކަމަށެވެ.

ހަމަލާތަކުގެ އިތުރުންވެސް، ޣައްޒާގެ ބޯޑަރުތައް ބަންދުކޮށް، އެހީ ވެއްދުމަށް ޔަހޫދީން އަޅަމުންދާ ދަތިކުރުމުގެ ފިޔަވަޅު ތަކުގެ ސަބަބުން ބަނޑުހައިހޫނު ކަން އިންތިހާއަށް ބޮޑުވެ، މި ވޭނުގައި މިހާތަނަށް 32 މީހަކު ވަނީ ޝަހީދުވެފައެވެ. 

ޣައްޒާ ގެ އާއްމުން ބޭނުންވާ ސިއްހީ އެހީ ވެއްދުމަށް ވެސް ހުރަސްތަކާއި ކުރިމަތިލާން ޖެހިފައިވާއިރު، އެކަމާއި ގުޅިގެން ޣައްޒާގައި ބަލި ފެތުރޭ މިންވަރު އިތުރުވެ، ދޭން ޖެހޭ ފަރުވާ ދިނުމަށް ގޮންޖެހުންތަކެއް ހުރިކަން ފާހަގަކޮށްލަން ޖެހެއެވެ.

މި މަހުގެ 2 ވަނަ ދުވަހު ޣައްޒާގެ ހެލްތު މިނިސްޓްރީން އާއްމު ކުރި ތަފާސް ހިސާބުތަކުން ދައްކާ ގޮތުގައި: 

1) ހަމަލާތަކުގައި ލިބުނު ޒަހަމްތަކާއި ގުޅިގެން އިތުރު ފަރުވާއަށް ބޭރަށް ދާން ޖެހިފައިވާ އާއްމުން - 11،000

2) ކެންސަރު ބަލި ތަހައްމަލު ކުރަމުންދާ ފަރާތްތަކުގެ ތެރެއިން ފަރުވާ ނުލިބި ނާޒުކު ހާލަތެއްގައި ތިބި އާއްމުން - 10،000

3) ގަތުލުއާއްމުގެ ސަބަބުން ގައިންގަޔަށް އަރާ ބަލިތައް ފެތުރި، އެބަލިތައް ތަހައްމަލު ކުރަމުންދާ އާއްމުން - 1,095,000

4) ހެޕަޓައިޓިސް ގެ ކޭސްތައް- 20,000

5) ސިއްހީ ހިދުމަތް ނުލިބުމުގެ ސަބަބުން ރިސްކްގައި ތިބި ބަނޑުބޮޑު އަންހެނުން- 60,000

6) ހިތުގެ ބަލި ތަހައްމަލު ކުރަމުންދާ ފަރާތްތަކުގެ ތެރެއިން ރިސްކްގައި ތިބި ފަރާތްތައް- 350,000

ޣައްޒާގެ އާއްމުންނަށް އަމާޒުކޮށް ޔަހޫދީ ފައުޖުން ދެމުން އަންނަ ހަމަލާތައް ހުއްޓާލުމަށް އދ އާއި ބައިނަލްއަގުވާމީ ކޯޓުތަކުގެ އިތުރުން، ދުނިޔޭގެ ގިނަ ގައުމުތަކާއި، ޖަމިއްޔާތަކުން ގޮވާލަމުން އަންނަ އިރުވެސް، ހަމަލާތައް ހުއްޓާލާފައެއް ނުވެއެވެ.

ދާދި ފަހުން ޔަހޫދީން ޣައްޒާ އަށް ދެމުން އަންނަ ހަމަލާތައް ހުއްޓާލުމަށް އެމެރިކާއިން ހުށަހެޅި ގަރާރެއް އދ އިން ފާސްކޮށްފައިވާއިރު، ގަތުލުއާއްމު ހުއްޓުމާއި ބެހޭ ކަންކަމަށް ތާއީދު ކުރާނެ ކަމަށް ހަމާސް އިން ވަނީ ބުނެފައެވެ.