ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ އެދިވަޑައުގަތުމަށް ފަލަސްޠީނަށް އެހީވުމަށް ކުރިއަށް ގެންދިޔަ "ފަލަސްޠީނާއެކު ދިވެހިން" ޓެލެތޯނުގެ އެކައުންޓަށް ފައިސާ ޖަމާކުރެވޭ ވަގުތު މަދާމާ ހަވީރު 06:00އާ ހަމައަށް އިތުރުކޮށްފިއެވެ.

މި ޓެލެތޯން އިންތިޒާމް ކޮށް ކުރިއަށް ގެންދާ ޕަބްލިކް ސާވިސް މީޑިއާ، ޕީއެސްއެމްގެ މެނޭޖިންގް ޑިރެކްޓަރ ޒީނާ ޒާހިރު ވިދާޅުވީ، ފަލަސްތީނަށް އެހީވުމަށް ހުޅުވާލި ފަނޑަށް ފައިސާ ޖަމާކުރަމުން ދިޔައިރު ބައެއް ބައެއް ފަރާތްތަކަށް ޖަމާ ނުކުރެވުނު ކަމުގެ ޝަކުވާ ލިބިފައިވާ ކަމަށެވެ. އަދި އެކަމުގެ ސަބަބުން ޓެލެތޯންއަށް ހަމަޖައްސާފައިވާ އޮޑިޓް ފަރމްއާ މަޝްވަރާކުރުމަށްފަހު ޓްރާންސްފާ މެދުވެރިކޮށް ފައިސާ ބަލައިގަތުމަށް ވަގުތު އިތުރުކޮށްދީފައުވާ ކަމަށް ޒީނާ ވިދާޅުވިއެވެ.

"އަޅުގަނޑުމެންނަށް މައުލޫމާތު ލިބެނީ އެއީ އެއްފަހަރާ ގިނަ ބަޔަކު އެއްފަހަރާ ފައިސާ ޖަމާކުރަން އުޅުމުން ވީ ގޮތެއް ކަމަށް. އެހެން ވުމުގެ ސަބަބުން އަޅުގަނޑުމެން މިރޭ މި ނިންމީ ކުރިން ހެނދުނު 8:00 އިން މެނދަމު 12:00 ޓެލެތޯން ކުރިއަށް ގެންދާ ގޮތަށް އޮތީ، އެހެން ނަމަވެސް މިހާރު އަޅުގަނޑުމެން ނިންމާފައި މިވަނީ ޓެލެތޯންގެ މި ލައިވް ޝޯ މިރޭ ނިންމާލި ކަމުގައިވިއަސް ބުރާސްފަތި ދުވަހުގެ އިރުއޮއްސި 6:00 ޖެހުމާއި ހަމައަށް ޓްރާންސްފާ ކުރުމުގެ ފުރުސަތު ދޭން" ޒީނާ ވިދާޅުވިއެވެ.

އެހެންކަމުން ފައިސާ ޖަމާކުރަން ބޭނުންވާ ފަރާތްތަކުން، ދިވެހި ފައިސާއިންނަމަ 7730000655865 އަދި ޑޮލަރުން ނަމަ، 7730000655866 އެކައުންޓަށް ޖަމާކުރުމަށް ޕީއެސްއެމްއިން އެދެއެވެ. 

ޕީއެސްއެމް އިން މައުލޫމާތު ދީފައިވާ ގޮތުން، ރޭގެ 12:00 ޖެހުމާއި ހަމައަށް 13،133،927ރ. (ތޭރަ މިލިއަން އެއް ލައްކަ ތިރީސް ތިން ހާސް ނުވަސަތޭކަ ހަތަވީސް ރުފިޔާ) ލިބިފައިވެއެވެ. އަދި 33،693.42 ޑޮލަރު ފަނޑަށް ލިބިފައިވާކަން ޕީއެސްއެމުން ވަނީ ހާމަކޮށްފައެވެ. މީގެ އިތުރުންވެސް، މާލޭގެ އެކި ސަރަހައްދުތަކުގައި ބެހެއްޓި 13 ފަންޑު ފޮށީގެ ތެރެއިން ގިނަ ފަނޑުފޮށިތަކުގައި ހުރި ފައިސާ ގުނުމުގެ މަސައްކަތް ކުރަމުންދާ ކަމަށްވެސް ބުނެފައިވެއެވެ.