ރާއްޖޭގައި ގައުމީ ފެންވަރުގައި ކުޅޭ އިންޑިވިޖުއަލް ކުޅިވަރުތަކުގެ ތެރެއިން މިވަގުތު އެންމެ ހަލުވިކަމާއެކު ކުރިއަރަމުން އަންނަ އެއް ކުޅިވަރަކީ ޗެސް އެވެ. އެގޮތުން މިކުޅިވަރުގައި ގައުމީ ފެންވަރުގައި ވާދަކުރާ ކުޅުންތެރިންގެ އަދަދު އަަަަހަރަކަށް ފަހު އަހަރެއް އުތުރުވަމުން އަންނައިރު، މިއަހަރުގެ ގައުމީ ޗެސް މުބާރާތުގައި ވަނީ ރެކޯޑް އަދަދަކަށް ކުޅުންތެރިން ބައިވެރިވެފައެވެ.

އެގޮތުން 2024 މެއި 27 އިން 2024 ޖޫން 7 ގެ ނިޔަލަށް މާލެ ސިޓީގައި ކުރިއަށްދިޔަ 10 ވަނަ ގައުމީ ޗެސް މުބާރާތުގައި ޖުމްލަ 111 ކުޅުންތެރިއަކު ވާދަކޮށްފައިވެއެވެ. އޭގެތެރޭގައި ހިމެނެނީ އަންހެން ކެޓަގެރީގައި ބައިވެރިވި 33 ކުޅުންތެރިންގެ އިތުރުން އޯޕަން ކެޓަގެރީގައި ވާދަކުރި 78 ކުޅުންތެރިންނެވެ. އަދި މިއަހަރުގެ މުބާރާތުގައި ވަނީ ޖުމްލަ 580 މެޗު ކުޅެފައެވެ. 

މިއީ މިދިޔަ އަހަރު ބޭއްވި ގައުމީ ޗެސް މުބާރާތުގައި ބައިވެރިވި ކުޅުންތެރިންގެ ނިސްބަތުން 24 އިންސައްތަ އިތުރު އަދަދެކެވެ. އެގޮތުން މިދިޔަ އަހަރުގެ މުބާރާތުގެ އަންހެން ކެޓަގަރީގައި 19 ކުޅުންތެރިއަކު ވާދަކުރުއިރު، އޯޕަން ކެޓަގެރީގައި ވާދަކޮށްފައިވަނީ 65 ކުޅުންތެރިންނެވެ. މިއާއެކު މިއަހަރުގެ މުބާރާތް ވެގެންގޮސްފައި ވަނީ ގައުމީ މުބާރާތުގެ ތާރީހުގައި އެންމެ ގިނަ ކުޅުންތެރިން ވާދަކުރި މުބާރާތަށެވެ.

Advertisement

މިއަހަރުގެ މުބާރާތުގެ އަންހެން ބައިގެ ޗެމްޕިއަންކަން ހޯދީ ނިހާޔާ އަޙުމަދު އެވެ. އަދި ފިރިހެން ބައިގެ ޗެމްޕިއަންކަން ހޯދީ މުޙައްމަދު ޝުއާއު އެވެ.