ޔޫރޯ 2024 ފުޓްބޯޅަ މުބާރާތުގެ ގުރޫޕް އޭގައި ހުކުރު ދުވަހުގެ ރޭ ކުޅުނު ފުރަތަމަ މެޗުގައި ސްކޮޓްލޭންޑާއި ޖަރުމަނު ވާދަކުރި މެޗު 5-1 ގެ ތަފާތުބޮޑު ނަތީޖާއަކުން ކާމިޔާބުކޮށް ޖަރުމަނުން މުބާރާތުގެ ފެށުން ރަނގަޅުކޮށްފިއެވެ.

މެޗުގެ ފުރަތަމަ ހާފުގައި ޖަރުމަނު ކުޅުންތެރިންގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، ސްކޮޓްލޭންޑަށް މިމެޗުގައި އިތުރު މައްސަލަތަކެއް ކުރިމަތިވީ ފުރަތަމަ ހާފު ނިމެންދަނިކޮށް، އެޓީމުގެ ރަޔަން ޕޯޓިއެސް، އެޓީމުގެ ޕެނަލްޓީ އޭރުއާ ތެރެއިން ޖަރުމަނުގެ މިޑްފީލްޑަރު ގުންޑޮގަންއަށް ކުރި ނުރައްކާތެރި ފައުލަކާ ގުޅިގެން މެޗުގެ ރެފްރީ އޭނާއަށް ސީދާ ރަތް ކާޑެއް ދައްކައި ދަނޑުން ފޮނުވާލާފައެވެ.

މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުންތެރިއަކު މަދުކޮށެވެ. އަދި މިފައުލާއި ގުޅިގެން ޖަރުމަނަށް ޕެނަލްޓީއެއް ލިބުނުއިރު، ފުރަތަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން ޖަރުމަނު ކުރީގައި އޮވެގެންނެވެ.

މެޗުގެ ދެވަނަ ހާފުގައި ސްކޮޓްލޭންޑުން އެއް ކުޅުންތެރިއަކު މަދުކޮށް ކުޅުނުއިރު، މިހާފުގައި ޖަރުމަނުން ވަނީ އިތުރު ދެލަނޑު ކާމިޔާބުކޮށްފައެވެ. އަދި މިމެޗުގައި ސްކޮޓްލޭންޑުން ކާމިޔާބުކުރި ހަމައެކަނި ލަނޑަކީ ދެވަނަ ހާފުގެ ފަހުކޮޅު ޖަރުމަނުގެ ޕެނަލްޓީއޭރިއާ ބޭރުން އެޓީމަށް ލިބުނު ހިލޭޖެހުމެއްގައި ކެޕްޓަން އެންޑްރޫ ރޮބާޓްސަން ގޯލު ކުރިމަށްޗަށް ހުރަސްކޮދިން ބޯޅައެއްގައި އެޓީމުގެ ސްކޮޓް މެކެނާ ބޮލުން ފޮނުވާލި ހަމަލާއެއް ދިފާއުކުރަން އުޅުމުގެ ތެރޭގައި ޖަރުމަނުގެ ޑިފެންޑަރު އެންޓޯނިއޯ ރުޑިގާ އަތުން ބައިކޮޅަށް ވަން ލަނޑެކެވެ.

މީގެ އިތުރުން މިމެޗުގައި ޖަރުމަނުގެ ޒުވާން މިޑްފީލްޑަރު ފްލޯރިއަން ވާޓްޒް، ޖަމާލް މުސިއާލާ، ކައި ހަވާޓްޒް،ނިކްލަސް ފުލްކްރޫގް އަދި އެމްރޭ ޗާން މިއިން ކޮންމެ ކުޅުންތެރުއަކު ވަނީ އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުލުންތެރިއަކަށް ހޮވުނީ ޖަރުމަނުގެ ޒުވާން މިޑްފީލްޑަރު ޖަމާލް މުސިއާލާ އެވެ.

މިމުބާރާތުގައި މާދަމާ ރޭ ތިން މެޗު ކުޅުމަށް ހަމަޖެހިފައިވާއިރު، ފުރަތަމަ މެޗުގައި 18:00 ގައި ހަންގޭރީ އާއި ސްވިޒަލޭންޑް ވާދަކުރާއިރު، ދެވަނަ މެޗުގައި 21:00 ގައި ކްރިއޭޝިއާ އިން ނުކުންނާނީ ސްޕެއިން އާއި ދެކޮޅަށެވެ. އަދި 00:00 ކުޅެވޭ ތިންވަނަ މެޗުގައި އެންމެ ފަހުގެ ޗެންޕިއަން އިޓަލީ ނުކުންނާނީ އަލްބޭނިއާއި ދެކޮޅަށެވެ.