މިއަހަރު މާތްވެގެންވާ ހައްޖުގެ އަޅުކަން އަދާކުރުމަށް ގޮސް ތިބި ފަރާތްތަކަށް އަމާޒުކޮށް ސައުދީ އަރަބިއާ އިން ސެލްފް ޑްރައިވިން ޓެކްސީ ތައާރަފްކޮށްފިއެވެ.

ސައުދީ ސަރުކާރުގެ ނޫހެއް ކަމަށްވާ އެސްޕީއޭ އިން ރިޕޯޓް ކުރާ ގޮތުގައި މިއީ ހައްޖުވެރިން އެއްތަނުން އަނެއްތަނަށް އުފުލުމަށާއި، ކުއްލިއަކަަށް ދިމާވާ ސިއްހީ ހާލަތްތަކުގައި ފަރުވާ ދިނުމަށް ބޭނުންވާ ވަސީލަތްތަކާއި އެނޫންވެސް ތަކެތި ހައްޖުވެރިންނަށް އަވަހަށް ފޯރުކޮށްދިނުމުގެ ގާބިލުކަން ލިބިފައިވާ އުޅަނދުތަކެކެވެ.

ސެލްފް ޑްރައިވިން ޓެކްސީ ތައާރަފް ކުރުމަށް ބޭއްވި ހަފްލާގައި ވާހަކަފުޅު ދައްކަވަމުން ސައުދީގެ ޓްރާންސްޕޯޓް އެންްޑް ލޮޖިސްޓިކަލް ސާވިސަސް މިނިސްޓަރު ޞާލިޙް ބިން ނާޞިރު އަލްޖަޞީރު ވިދާޅުވީ، މިއީ ތިމާވެއްޓާއި ރައްޓެހި އަދި އާޓީފިޝަލް އިންޓެލިޖެންސް ބޭނުންކުރުމުގެ މަގްސަދުގައި އުފެއްދި އުޅަނދެއް ކަމަށެވެ.

Advertisement

މި ހިދުމަތާއި ގުޅޭ ގޮތުން އަލްޖަޞީރު އިތުރަށް ވިދާޅުވީ، މިއީ ސިވިލް އޭވިއޭޝަން އޮތޯރިޓީއެއްގެ ފަރާތުން ހުއްދަ ލިބުނު ފުރަތަމަ އުދުހޭ ޓެކްސީ ކަމަށެވެ. 

މިއީ މިއަހަރުގެ ހައްޖުގެ ކަންތައްތައް ވީހާ ވެސް އޮމާން ކަމާއިއެކު ކުރިއަށް ގެންދިޔުމަށް އެ ގައުމުން ތައާރަފްކުރި 32 ވަނަ ޓެކްނޮލޮޖީގެ ވަސީލަތެވެ. މި އުޅަނދުގެ އިތުރުންވެސް ސައުދީ އިން ވަނީ އިލެކްޓްރިކް ކާރާއި، ހައިޑްރޮޖެން ޓްރެއިން ފަދަ ތަކެތި ތައާރަފްކޮށް، ދަތުރުފަތުރުގެ ނިޒާމް ޒަމާނީ ކުރުމަށް އަމާޒު ހިފާފައިކަން ފާހަގަކޮށްލަން ޖެހެއެވެ.