ޗައިނާގައި އުފައްދާ އިލެކްޓްރިކް ކާރުތައް ވިލާތުގެ ޤައުމުތަކަށް އެތެރެކުރުމަށް ނަގާ އިމްޕޯޓް ޓެރިފް 38 އިންސައްތަ އިތުރުކުރުމަށް ޔޫރަޕިއަން ކޮމިޝަނުން ނިންމައިފިއެވެ.

ޔޫރަޕިއަން ކޮމިޝަނުން މި ނިންމުން ނިންމީ ޗައިނާގެ ސަޕްލައި ޗެއިންތެރެއިން ލިބޭ ސަބްސިޑީތަކާއި އެހެނިހެން އެހީތަކުގެ ސަބަބުން 'އަންފެއަރ' ފައިދާތަކެއް ޗައިނާގެ އިލެކްޓްރިކް ވެހިކަލް އުފައްދާ ކުންފުނުތަކަށް ލިބޭކަމަށް އެކޮމިޝަނުގެ ރިޕޯޓަކުން ދެއްކުމާ ގުޅިގެންނެވެ.

ޗައިނާގައި އުފައްދާ އިލެކްޓްރިކް ކާރުތަކުން ޓެރިފް އިތުރުކުރުމަށް ޔޫރަޕިއަން ކޮމިޝަނުން ނިންމިނަމަވެސް، މި ނިންމުމަށް ޔޫރަޕްގެ ހުރިހާ ގައުމުތަކުން ތާއީދެއް ނުކުރެއެވެ. އެގޮތުން ޗައިނާއާއެކު އޮންނަ ގުޅުން ބަދަހިކުރުމަށް މަސައްކަތްކުރަމުންދާ ހެންގޭރީއިން ވަނީ ޔޫރަޕިއަން ކޮމިޝަންގެ މި ނިންމުމަކީ ވިޔަފާރީގެ ވާދަވެރިކަމަށް އެންމެ ފައިދާހުރި ގޮތް ނޫންކަމަށާއި، މިއީ ޗައިނާއާމެދު ތަފާތުކުރުން ގެންގުޅުންކަމަށް ސިފަކޮށްފައެވެ. ހަންގޭރީ އިން ދަނީ ޗައިނާގެ އިލެކްޓްރިކް އުޅަނދުތަކުގައި ބޭނުންކުރާ ބެޓެރި އުފައްދާ ޔޫރަޕްގެ މަރުކަޒަކަށް އެގައުމު ހެދުމަށް ގިނަ މަސައްކަތްތަކެއް ކުރަމުންނެވެ.

Advertisement

ޗައިނާގެ ވިޔަފާރިއާއި ބެހޭ ވުޒާރާއިންވެސް ވަނީ ޔޫރަޕިއަން ކޮމިޝަނުގެ ނިންމުމަށް ފާޑުކިޔާފައެވެ. ބުދަ ދުވަހު ޗައިނާގެ ކޮމަރސް މިނިސްޓްރީއިން ބުނީ މިޓެރިފް ތަކަކީ މާ މަތީ ޓެރިފްތަކެއްކަމަށާއި، ޓެރިފްތައް އިއުލާންކުރުމަށް ޔޫރަޕިއަން ކޮމިޝަނުން ދެއްކު ހުއްޖަތްތަކަކީ އެއްވެސް ހަގީގަތެއް ނެތް އަދި ބައިނަލްއަގްވާމީ ގާނޫނުތަކުގެ ކުރިމަތީގައި އެއްވެސް އަސާސެއް ނެތް ވާހަކަތަކެއްކަމަށެވެ. އަދި މިއީ ޗައިނާއާއި ޔޫރަޕާ ދެމެދު އުފެދިފައިވާ ވިޔަފާރީގެ ނުތަނަވަސްކަން އިތުރުކުރުމަށް ޔޫރަޕިއަން ކޮމިޝަނުން އެޅި ފިޔަވަޅެއްކަމަށްވެސް ޗައިނާއިން ސިފަކުރެއެވެ.

ޗައިނާއިން ޔޫރަޕަށް އެތެރެކުރާ އިލެކްޓްރިކް ވެހިކަލްތަކަށް މިހާރުވެސް 10 އިންސައްތައިގެ ޓެރިފެއް ނަގައެވެ. އިއްޔެ އިއުލާންކުރި ބަދަލުތަކާއެކު ޗައިނާގެ ސަރުކާރު ހިއްސާވާ އެސް.އޭ.އައި.ސީ މޮޓޯރސްގެ ކާރުތަކުން 38.1 އިންސައްތަ، ގީލީ ހޯލްޑިންގ ކުންފުނީގެ މޮޑެލްތަކުން 20 އިންސައްތަ އަދި ބީ.ވައި.ޑީ ގެ މޮޑެލްތަކުން 17.4 އިންސައްތައިގެ ޓެރިފެއް ނަގަން ފަށާނެއެވެ. ޔޫރަޕިއަން ކޮމިޝަނުން ޗައިނާގެ އިލެކްޓްރިކް އުޅަނދުތަކުގެ މާކެޓް ދިރާސާކުރުމަށް ކުރި މަސައްކަތުގައި އެއްބާރުލުން ދިން ކުންފުނިތަކުގެ މޮޑެލްތަކަށް ޓެރިފް ކުޑަކޮށްދިންއިރު، އެއްބާރުލުން ނުދޭ ހުރިހާ ބްރޭންޑަކަށް 38 އިންސައްތައިގެ ޓެރިފެއް މަތިކުރާނެކަމަށް އެކޮމިޝަނުން ވަނީ ނިންމާފައެވެ.

ޗައިނާގެ އިލެކްޓްރިކް ވެހިކަލް އުފައްދާ ކުންފުނިތަކުން ޔޫރަޕްގައި މަގުބޫލު ގިނަ ބްރޭންޑްތަކެއް އުފައްދައެވެ. އެގޮތުން ވޮލްޥޮ ގްރޫޕްގެ ބޮޑު ހިއްސާއެއް ގީލީ އިން ކޮންޓްރޯލްކުރާއިރު، ވޮލްކްސްވޭގަން ގްރޫޕުން ޗައިނާގެ ކުންފުނިތަކާއެކު ގިނަ މަސައްކަތްތަކެއް ދަނީ ކުރަމުންނެވެ.