26 ޖޫން 2024 އިން 30 ޖޫން 2024 އަށް އިންޓަނޭޝަނަލް ކުލަބު ފުރެންޑްލީ މެޗުތަކެއް ކުޅުމަށްޓަކައި ބަންގްލަދޭޝް ގައުމީ ހޭންޑްބޯޅަ މުބާރާތުގެ 2023ވަނަ އަހަރުގެ ޗެންޕިއަން އަންސަރު އެންޑް ވީޑީޕީ ރާއްޖެ އައުމަށް ހަމަޖެހިފައިވާކަމަށް ހޭންޑްބޯޅަ މޯލްޑިވްސް އިން ބުނެފިއެވެ.

ހޭންޑްބޯޅަ މޯލްޑިވްސް އިން މައުލޫމަތު ދޭ ގޮތުގައި އަންސަރުގެ މިދަތުރަކީ ހޭންޑްބޯޅަ މޯލްޑިވްސް ރައީސްގެ ދައުވަތަކަށް އެކުލަބުން އަންނަ ދަތުރެކެވެ. އަދި އަންސަރު އެންޑް ވީޑީޕީގެ މިދަތުރުގައި އެޓީމުން ރާއްޖޭގައި ތިން މެޗު ކުޅުމަށް ހަމަޖެހިފައިވާކަމަށެވެ.

ފުރަތަމަ މެޗުގައި 26 ވަނަ ދުވަހު އެޓީމުން ނުކުންނާނީ ދިވެހި ސިފައިންގެ ކުލަބު (ޑީއެސްސީ) އާއި ދެކޮޅަށެވެ. އަދި ދެވަނަ މެޗުގައި 28 ވަނަ ދުވަހު އެޓީމުން ނުކުންނާނީ 2023 ވަނަ އަހަރުގެ ގައުމީ ޗެންޕިއަން ވެލިދޫ ޔުނައިޓެޑާއި ދެކޮޅަށެވެ.

Advertisement

މީގެ އިތުރުން އެޓީމުގެ ފަހު މެޗުގައި 30 ވަނަ ދުވަހު ނުކުންނާނީ 19 އަހަރުންދަށުގެ ގައުމީ ޓީމައި ދެކޮޅަށެވެ. އަދި މިހުރިހާ މެޗެއްވެސް ކުޅުމަށް ހަމަޖެހިފައި ވަނީ ރޭގަނޑު 20:30 ގައި ގައުމީ ހޭންޑްބޯޅަ ކޯޓުފައެވެ.

އިތުރަށް ވާހަކަ ދައްކަމުން ހޭންޑްބޯލް މޯލްޑިވްސްގެ އޮފިޝަލު ވިދާޅުވީ މި އެސޯސިއޭޝަންގެ ފަރާތުން މިފަދަ މެޗުތަކެއް އިންތިޒާމުކުރުމުގެ ބޭނުމަކީ ދިވެހި ކުލަބުތަކަށް ބައިނަލްއަގުވާމީ ތަޖުރިބާ ހޯދައިދިނުމުގެ އިތުރުން ސަރަހައްދުގެ ކުލަބުތަކާއި ދިވެހި ހޭންޑްބޯޅަ ޓީމުތަކުގެ ފަރަގު ކުޑަކުރުމަށެވެ.

ރާއްޖޭގެ ހޭންބޯޅަ ކުރިއެރުވުމަށްޓަކައި ހޭންޑްބޯލް މޯލްޑިވްސްގެ ފަރާތުން ގިނަ ގުނަ މަސައްކަތްތަކެއް އަންނަނީ ކުރަމުންނެވެ. އަދި އެސޯސިއޭޝަނުން އެދެނީ ބަންގްލަދޭޝް ޗެންޕިއަން އަންސަރު އެންޑް ވީޑީޕީ އާއި ދެކޮޅަށް ޑީއެސްސީ އަދި ވެލިދޫ ޔުނައިޓެޑުގެ އިތުރުން 19 އަހަރުން ދަށުގެ ގައުމީ ޓީމު ކުޅޭ މެޗުތަކަށް ވީހާވެސް ގިނަ ސަޕޯޓަރުން ދަނޑަށް އައިސް ދިވެހި ޓީމުތަކަށް ތަރުހީބު ދިނުމަށެވެ.