ޔަހޫދީންގެ ލާއިންސާނީ ހަމަލާތައް ތަހައްމަލު ކުރަމުންދާ ފަލަސްތީނުގެ އަޚުންނާއި އުޚުތުންނަށް ކުރިމަތިވެފައިވާ ހިތްދަތި ހާލުން އަރައިގަތުމަށް އެދި ދުޢާކުރުމަށް ޙައްޖު ޚުތުބާގައި ގޮވާލައްވައިފިއެވެ.

މި ޚުތުބާގައި ފަލަސްތީނުގެ ރައްޔިތުންނަށް ކުރިމަތިވެފައިވާ ނިކަމެތި ހާލުން މިންޖުކުރެއްވުމަށް އެދި ދުއާ ކުރުމަށް ވަނީ ގޮވާލައްވާފައެވެ.

މިއަދު އިއްވި ޙައްޖު ޚުތުބާގައި އެކަކު އަނެކަކުގެ މަސްލަހަތު ރައްކާތެރިކޮށް، ފާސިދު ކަންކަމުން ދުރުހެލިވެ، އެއްބަޔަކު އަނެއްބަޔަކަށް ގެއްލުން ދިނުމުން ދުރުހެލިވުމަށް ވެސް ވަނީ ގޮވާލައްވާފައެވެ.

ހަމައެއާއިއެކު، ކީރިތި ރަސޫލާ ޞައްލަﷲ ޢަލައިހި ވަސައްލަމް ގެ ޙައްޖަތުލް ވަދާއުގެ ހުތުބާގައި ހަދީޘް ކުރެއްވި ބައެއް ކަންކަމަށް އަލިއަޅުވާލާ، ޚުތުބާގައި ވަނީ އެކެއްގެ ލެޔާއި ނަފްސު އަނެކާއަށް ހަރާމްވެގެންވާކަން ބަޔާންކޮށްފައެވެ. އަދި މީހުން ނުރުހޭ ނަންނަމުން ނުގޮވުމަށާއި، އެއް ބަޔަކު އަނެއް ބަޔަކަށް ގެއްލުން ނުދިނުމަށާއި، ރަލާއި މަސްތުވާތަކެތި ފަދަ ޝައިތާނީ އަމަލުތަކުން ދުރުހެލިވުމަށް ވެސް ޙައްޖު ޚުތުބާގައި ވަނީ ނަސޭހަތްތެރިވެފައެވެ.

މިއަހަރުގެ ޢަރަފާތު ދުވަހުގެ ޚުތުބާ ދެއްވާފައިވަނީ މަސްޖިދުލް ޙަރަމްގެ އިމާމު، ޝެއިޚް މާހިރު ބިން ޙަމަދު އަލްމުޢައިޤްލީއެވެ.

މަސްޖިދުލް ނަބަވީގެ އިމާމުކަން ވެސް ކުރެއްވި ޝެއިޚް މާހިރު، މަސްޖިދުލް ޙަރަމްގެ އިމާމުގެ އައްޔަނުކުރައްވާފައިވަނީ 2007 ވަނަ އަހަރުއެވެ. ޝެއިޚް ތަޢުލީމް ޙާޞިލްކުރެއްވީ މައްކާގެ އުއްމުލް ޤުރާ ޔުނިވަރސިޓީންނާއި ރިޔާޞްގެ ކިންގް ސަޢުދު ޔުނިވަރސިޓީންނެވެ.

ޢަރަފާތު ދުވަހަކީ ޙައްޖުގެ އަޅުކަމުގެ އެންމެ މުހިއްމު ދުވަހަށްވާއިރު، އަރަފާތު ދުވަހުގެ ހުތުބާ ދެނީ، ކީރިތި ރަސޫލާ މުޙައްމަދު (ސ.ޢ.ވ) ޢަރަފާތު ދުވަހުގެ ޚުތުބާ ދެއްވި މަޤާމުގައި ބިނާކޮށްފައިވާ މަސްޖިދުލް ނަމިރާގައެވެ. މި މިސްކިތަކީ މައްކާގެ ދެވަނައަށް އެންމެ ބޮޑު މިސްކިތެވެ.

ޙައްޖު ދުވަސް ނުވަތަ ޢަރަފާތު ދުވަހަކީ އެތައް ގޮތަކުން ބަރަކާތްތެރި ދުވަހަކަށް ވާއިރު، އެއީ އެތައް މިލިއަން މުސްލިމުން މާތްވެގެންވާ އަރަފާތު ބިމުގައި ހޭދަ ކުރާ ދުވަހެވެ.

ހަމައެއާއިއެކު، މި ދުވަހަކީ މާތް ﷲ ގެ އަޅުތަކުންގެ ތެރެއިން ގިނަ ބަޔަކު ނަރަކައިން މުއްތިކުރައްވާ ދުވަހަށް ވުމާއިއެކު، އެއީ މާތް ﷲ ގެ ދީން ފުރިހަމަކުރެއްވިކަން ޢިއުލާންކުރެއްވި، އަދި  މުޅި އިސްލާމީ އުންމަތަށް ކީރިތި ރަސޫލާ ސައްލަﷲ ޢަލައިހި ވަސައްލަމްގެ ވަސިއްޔަތްޕުޅު އިއްވި ދުވަސްކަން ވެސް ފާހަގަކޮށްލަން ޖެހެއެވެ.