ޔޫރޯ 2024 ފެ ގުރޫޕް ބީގައި މިރޭ ސްޕެއިން އާއި ކްރޮއޭޝިއާ ވާދަކުރި މެޗުގެ ފުރަތަމަ ހާފުގައި ކާމިޔާބުކުރި ލަނޑުތަކާއެކު 3-0 ގެ ނަތީޖާއަކުން މޮޅުވެ ސްޕެއިނުން މުބާރާތުގެ ފެށުން ރަނގަޅުކޮށްފިއެވެ.

މެޗުގެ ފުރަތަމަ ހާފުގެ ކުރީކޮޅު ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު މެޗުގެ އޮއިވަރު ބަދަލުވީ ސްޕެއިނުން މެޗުގެ ލީޑު ހޯދި ހިސާބުންނެވެ.

މިމެޗުގައި ސްޕެއިނުން ލީޑު ހޯދި ލަނޑު ފުރަތަމަ ހާފުގެ 29 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން އަލްވާރޯ މޮރާޓާއެވެ. މިއީ އެޓީމުގެ މިޑްފީލްޑަރު ފަބިއަން ރުއިޒް ތަނަވަސްކޮށްދިން ފުރުސަތެއްގައި ބޯޅައާއެކު ޕެނަލްޓީ އޭރިއާތެރެއަށްވަދެ ތިރިތިރިން ފޮނުވާލި ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. އަދި އޭގެ ތިން މިނެޓު ފަހުން ރުއިޒް ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

Advertisement

މިއީ އެޓީމުގެ ޒުވާން މިޑްފީލްޑަރު ޕެޑްރީ ތަނަވަސްކޮށްދިން ފުރުސަތެއްގައި ކައިރީގައި ތިބި ކްރޮއޭޝިއާގެ ތިން ކުޅުންތެރިން ކައިރިން ވަރަށް ފަސޭހަކަމާއެކު ނައްޓާލުމަށްފަހު ތިރިތިރިން ފޮނުވާލި ބާރު ހަމަލާ ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. އަދި ފުރަތަމަ ހާފުގެ އިތުރުވަގުތުގެ ތެރޭގައި އެޓީމުގެ ތިންވަނަ ލަނޑު ކާމިޔާބުކޮށްދިނީ ތަޖްރިބާކާރު ޑިފެންޑަރު ޑެނީ ކަވަހާލް އެވެ.

މިއީ އެޓީމުގެ ޒުވާން ފޯވާޑް ލަމީން ޔަމާލް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން ސްޕެއިން ކުރީގައި އޮވެގެންނެވެ.

މެޗުގެ ދެވަނަ ހާފުގައި ދެޓީމުގެ ފަރާތުން ވަރަށް ވާފަވެރި ކުޅުމެއް ފެނިގެންދިޔައިރު،މިހާފުގައި ދެޓީމުންވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އެގޮތުން ނަތީޖާގެ ފަރަގު ކުޑަކުރުމަށް ފަހު ހާފުގެ 78 ވަނަ މިނެޓުގައި ކްރިއޭޝިއާއަށް ޕެނަލްޓީއެއް ވެސް ލިބުނެވެ.

ނަމަވެސް ޕެޓްކޮވިޗް ފޮނުވާލި ޕެނަލްޓީ ސްޕެއިންގެ ކީޕަރު އިނައި ސިމޮން ވަނީ ހުޝިއާރުކަމާއެކު ދިފާއުކޮށްފައެވެ. އަދި ރީބައުންސްއަށް ލިބުނު ބޯޅަ ޕެރިސިޗް ހުރަސްކޮށްދިނުމުން ޕެޓްކޮވިޗް އެބޯޅަ ގޯލުގެ ތެރެއަށް ފޮނުވާލި ނަމަވެސް، ވީއޭއާރުން ބެލުމަށްފަހު ރެފްރީ ނިންމީ އެއީ ރަނގަޅު ލަނޑެއް ނޫން ކަމަށެވެ. އެއީ ޕެޓްކޮވިޗް ޕެނަލްޓީ ކުރިއަށް ފޮނުވާލުމުގެ ކުރިން ކްރިއޭޝިއާގެ ކުޅުންތެރިއަކު ޕެނަލްޓީ އޭރިއާ ތެރެއަށް ވަދެފައިވާތީއެވެ.

މިގެ އިތުރުން ވެސް މިހާފުގައި ދެޓީމުން ވެސް ވަނި ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 3-0 ގެ ނަތީޖާއަކުން ސްޕެއިން ކުރީގައި އޮވެގެންނެވެ.