އިސްލާމީ އުސޫލުތަކާއި އެއްގޮތަށް، އެންމެން ޝާމިލް ކޮށްގެން، އަގުހުރި އިނާމްތަކާއިއެކު އދ. ދަނގެތީގައި ކުރިއަށް ގެންދާ “ބީއެމްއެލް އިސްލާމިކް ޢީދު އުފާ” ގެ ހަރަކާތްތައް މިއަދު ފަށައިފިއެވެ. 

ދަނގެތީ ޢީދު އުފާ ހަރަކާތްތައް ކުރިއަށް ގެންދަނީ އެރަށު ދީނީ ޖަމިއްޔާއެއް ކަމަށްވާ ޖަމިއްޔަތުލް ޤަލަމުން އިސްނަގައިގެން ރަށުގެ އެހެން މަދަނީ ޖަމިއްޔާ ތަކާއި މުވައްސަސާ ތަކާއި ގުޅިގެންނެވެ. އެގޮތުން، މި އަހަރުގެ ކުޅިވަރުތައް ހިންގުމުގައި، އެ ރަށު ޖަމިއްޔަތުލް އަންވާރު، ދަނގެތީ ސިއްހީ މަރުކަޒު، ދަނގެތީ މަސައްކަތްތެރިންގެ ޖަމިއްޔާ، އަންހެނުންގެ ތަރައްގީއަށް މަަސައްކަތްކުރާ ކޮމިޓީ، އަދި ދަނގެތި ޕޮލިސް ސްޓޭޝަނުން ބައުވެރިވެއެވެ. 

މި އަޟުހާ ޢީދުގެ ހަރަކާތްތައްވެސް ފަށާފައިވަނީ ބޮޑު ޖަމާޢަތުގައި ކުރެވުނު ޢީދު ނަމާދުންނެވެ. އެއަށްފަހު، އުޟުހިޔާ ކަތިލުން ކުރިއަށް ގެންގޮސްފައިވާއިރު، މި ހަރަކާތް ބަލާލުމަށް ކުދި ބޮޑު އެތައް ބަޔަކު ވަނީ އެ ރަށު އޯޕަން ސްޓޭޖް ސަރަހައްދަށް އެއްވެފައެވެ. 

މިއަދުގެ ޢީދު އުފާ ހަރަކާތްތަކުގެ ތެރެއިން އެންމެ ފޯރިއާއެކު ކުރިއަށްދިޔަ އެންމެ ޚާއްސަ ހަރަކާތަކީ ޢާއިލީ ހަވީރުގެ ތެރެއިން ކުރިއަށް ގެންދެވުނު ހަރަކާތްތަކެވެ. މި ހަވީރަށް އައި ހުރިހާ ކުޑަ ކުދިންނަށް ޢީދު ހަދިޔާ ބަހާފައިވާއިރު، ހަވީރުގައި ބަހަށްޓާފައި ހުރި ސްޓޯލްތަކުން ކުޅިވަރުތައް ކުޅުނު ކުދިންނަށްވެސް ހަދިޔާތައް ބަހާފައިވެއެވެ. މީގެ އިތުރުން ބޭބީ ނާސަރީ އިން ފެށިގެން ގްރޭޑް 4 އާއި ހަމައަށް ގްރޭޑް ކުޅިވަރުތައް، މި އާއިލީ ހަވީރުގެ ތެރެއިން ކުރިއަށް ގެންދެވި، އެ ކުޅިވަރުތަކުން އެއްވަނައަށް އައި ޓީމުގެ ހުރިހާ ކުދިންނަށް ހަދިޔާއަކަށް ކުޅޭ ކުޅޭ ސާމާނު ބަހާފައިވެއެވެ.

ހަމަމިއާއެކު، މި ޢާއިލީ ހަވީރު ކުރިއަށް ދިޔައިރު ގްރޭޑް 3 އަދި 4 ގެ ދަރުވަރުންގެ ފަރާތުން ސްޓޭޖް ހަރަކާތްތައްވެސް ވަނީ ހުށަހަލާއިދީފައެވެ. 

ދަނގެތީ ޢީދު އުފާ ހަރަކާތްތަކުގެ ތެރެއިން ދޫކޮށްލާ އެތައް އިނާމްތަކުގެ ތެރެއިން އެންމެ ޚާއްސަ އެއް އިނާމަކީ އާއިލީ ހަވީރާއި އިސް ރަށްވެހިންގެ ހަވީރުގެ ތެރެއިން އެ ހަވީރުގައި ބަްިވެރިވާ ހުރިހާ ބައިވެރިންގެ މެދުގައި ގުރުލައިގެން ހޮވޭ ނަސީބުވެރި ފަރާތަށް ދޫކޮށްލާ ބޮޑު ހަދިޔާއެވެ.

އެގޮތުން އެހެން ފަހަރުތަކެކޭވެސް އެއްގޮތަށް މިފަހަރުވެސް އާއިލީ ހަވީރުގައި ބައިވެރިވި ބޮޑެތި މީހުންގެ މެދުގަޔާއި ކުޑަކުދިންގެ މެދުގައިވެސް ގުރުލައިގެން ނަސީބުވެރި ފަރާތެއް ހޮވާފައިވާއިރު، ބޮޑެތިމީހުންގެ ތެރެއިން ހޮވުނު ނަސީބުވެރި  ފަރާތަށް ދީފައިވަނީ، ހައިސެންސް ބްރޭންޑްގެ 256 ލީޓަރ ގެ ބޮޑު ރެފްރިޖެރާޓަރ އެކެވެ. އަދި ކުޑަކުދިންގެ ތެރެއިން ނަސީބުވެރި ފަރާތަށް ދީފައިވަނީ ބައިސްކަލެކެވެ. 

އާއިލީ ހަވީރަށްފަހު، މިއަދުގެ ފަހު ހަރަކާތަކަށް ކުރިއަށް ގެންގޮސްފައިވަނީ ފިރިހެނުންގެ ހުނަރު ދައްކާލުމެވެ. މި ހަރަކާތް ކުރޮއަށް ދިޔައިރު، ހަރަކާތް ބަލަން ގޮސްތިބި މީހުންގެ މެދުގައި ގުރުލައިގެން ނަސީބުވެރި އެކި ފަރާތްތަކަށްވެސް އަގުހުރި އިނާމަތައް ދީފައިވެއެވެ. 

ދަނގެތީ ބީއެމްއެލް އިސްލާމިކް އީދު އުފާ ހަރަކާތްތައް ބުރާސްފަތި ދުވަހުގެ ރެއާއި ހަމައަށް ކުރިއަށްދިޔުމަށް ވަނީ ނިންމާފައެވެ. އެގޮތުން މާދަމާ ހަވީރު، އިސްރަށްވެހިންނަށް ޚާއްސަ ކޮށްގެން ބާއްވާ އިސްރަށްވެހިންގެ ހަވީރެއް އޮންނައިރު، މާދަމާ ރޭ، ބޮޑުމަސް ޝޯއާއކު އަންހެން ކަނބަލުންގެ ކެއްކުމުގެ މުބާރާތް، “ރަނިރަހަ” ގެ ފުރަތަމަ ބުރުވެސް އޮންނާނެއެވެ. އިސްރަށްވެހިންގެ ހަވީރުގެ ތެރެއިންވެސް ހަވީރަށް އަންނަ މީހުނާއި ކުދިންގެ މެދުގައި ގުރުލައިގެން ހޮވޭ ނަސީބުވެރިޔާއަށް ބޮޑެތި އިނާމަތައް ވަނީ ހުށަހަޅާފައެވެ. 

މިފަހަރުގެ އީދު އުފާގެ އެންމެ ބޮޑު އިނާމެއްގެ ގޮތުގައި ދޫކޮށްލަން ހަމަޖެހުފައުވަނީ، ނަސީބުވެރި ފަރާތަކަށް، ނަވާ ހައްޖު އެންޑް އުމްރާގެ ފަރާތުން ދޭ އުމްރާ ދަތުރެކެވެ. މީގެ އިތުރުން، ކުޑަކުދިންގެ ތެރެއިން ނަސީބުވެރި ފަރާޔަކަށް ކުޑަކުދިންގެ ސައިކަލަކާއި، ޓެބްލެޓެއް ދިނުމަށްވެސް ވަނީ ނިންމާފައެވެ. 

މިކަންކަމުގެ އިތުރުން، އީދު އުފާގެ މި ހަރަކާތްތައް ހުށަހެޅުމުގައި ކޮންމެ އަހަރަކު ޚާއްސަ މެހެމާނުން ބައިވެރިވާއިރު މި ފަހަރުގެ ޚާއްސަ މެހެމާނުންނަކީ ޕްރެޒެންޓަރ އަހުމަދު ހަމީދު އާއި، އިބްރާހިމް ރަމީޒު (ރަމީޒްބެ) އެވެ.