އިންޑިއާގެ ބޮޑުވަޒީރު ނަރެންދްރަ މޯދީ ގެ ފަރާތުން، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒަާއި ދިވެހިންނަށް އަޟްހާ އީދުގެ ތަހުނިޔާ ފޮނުއްވައިފިއެވެ.

ރާއްޖޭގައި ހުންނަ އިންޑިއާގެ ހައި ކޮމިޝަނުން ބޮޑުވަޒީރު މޯދީގެ މި މެސެޖް އެކްސް ގައި ހިއްސާ ކުރަމުން ބުނީ، ރައީސް ޑރ.މުޢިއްޒާއި އެމަނިކުފާނުގެ ސަރުކާރާއި އެންމެހާ ދިވެހީންނަށް ބަރަކާތްތެރި އަޟްހާ އީދުގެ ތަހުނިޔާ މޯދީ ފޮނުއްވާފައިވާ ކަމަށެވެ.

މި މެސެޖްގައި މޯދީ ވިދާޅުވީ، މިއަދު މި ފާހަގަކުރާ އުފާވެރި ދުވަހުން ހަނދާނަށް ގެނެސްދެނީ އެންމެން އުންމީދު ކުރާ ސުހްލަވެރި އަދި އެންމެން އެކުލެވޭ ދުނިޔެއެއް ބިނާ ކުރުމުގައި ބޭނުންތެރި، އެކުވެރިކަމާއި އެއްބައިވަންތަކަން ކަމަށެވެ.

ހަމައެއާއިއެކު، މިއީ އިންޑިއާގައި އޮތް މަލްޓި ކަލްޗަރަލް ހެރިޓޭޖް ގެ ތެރެއިން އެގައުމުގައި ވެސް ފޯރި އާއި އުފާވެރިކަމާއިއެކު ފާހަގަކުރެވޭ ދުވަހެއްކަން މޯދީ ފާހަގަކުރެއްވިއެވެ.

އިންޑިއާ އާއި ރާއްޖޭގެ ގުޅުން ކުރިއަށް ވުރެ ބަދަހިވަމުން އަންނައިރު، ދާދި ފަހުން ރައީސް ޑރ.މުޢިއްޒު ވަނީ އިންޑިއާގެ ބޮޑުވަޒީރު ކަމަށް ތިން ވަނަ ފަހަރަށް މޯދީ ހުވާކުރެއްވި ރަސްމިއްޔާތަށް ވެސް ވަޑައިގެންފައެވެ. މި ދަތުރުފުޅުގައި ރައީސް ޑރ.މުޢިއްޒުގެ އަރިހުގައި ސަރުކާރުގެ އިސްވަފުދެއް ވަޑައިގެންއިރު، އިންޑިއާއިން އެމަނިކުފާނަށް ހޫނު މަރުހާބައެއް ވަނީ ކިޔާފައެވެ.

މި ދަތުރުފުޅަށް ފަހު މީޑިއާތަކަށް މައުލޫމާތު ދެއްވަމުން ރައީސް ޑރ.މުޢިއްޒު ވަނީ ކުރިޔަށް އޮތް ތަނުގައި ދެޤައުމުގެ ގުޅުމުގެ ތެރެއިން ރަނގަޅު ކަންތައްތަކެއް ހަމަޖެހިގެންދާނެކަމަށާއި، ކަންކަން ފަހިވެގެންދާނީ ދިވެހިރާއްޖެއަށް އަދި ދިވެހިންނަށް ހެވާއިލާބަ ލިބޭގޮތަށްކަމަށް ވިދާޅުވެފައެވެ.