ހަމާސް ޖަމާއަތުން ދިން ވަރުގަދަ ރޮކެޓް ހަމަލާތަކެއްގައި ހައްދުފަހަނައަޅާފައިވާ ޔަހޫދީ ފައުޖުގެ 8 ސިފައިން މަރާލައިފިއެވެ.
މިއީ މިއަހަރުގެ ޖެނުއަރީ މަހުގެ ތެރޭގައި ދިން ހަމަލާގައި މަރާލި 21 ސިފައިންނަށްފަހު، ޔަހޫދީންނަށް އަމާޒުކޮށް ހަމާސް އިން ދިން އެންމެ ނުރައްކާތެރި އެއް ހަމަލާއެވެ.
ޣައްޒާގެ ދެކުނުގައި އޮންނަ ރަފާހްގެ ތަލް އަލް ސުލްތާން ކައިރީގައި ހަރަކާތްތެރިވަމުންދިޔަ ޔަހޫދީ ފައުޖަށް އަމާޒުކޮށް ހަމާސް އިން ދިން މިހަމަލާގައި، ޔަހޫދީންގެ އުޅަނދެއް ވެސް ވަނީ ގޮއްވާލާފައެވެ. މި ސަރަހައްދަކީ ޣައްޒާގައި ހުންނަ 8 ރެފިއުޖީ ކޭމްޕް ގެ ތެރެއިން އެއް ކޭމްޕް ހުންނަ ތަން ކަމަށްވާއިރު، މިއީ ފަހަކަށް އައިސް ޔަހޫދީން އެމީހުންގެ ލާއިންސާނީ އަމަލުތައް ހިންގަމުން އަންނަ އެއް ސަރަހައްދެވެ.
ހަމާސުން މި ހަމަލާ ދިނީ ޔަހޫދީ ފައުޖުން އެ ސަރަހައްދުގައި "އަސްކަރީ އޮޕަރޭޝަނެއް" ކުރިއަށް ގެންދިޔުމަށް ފަހު އެނބުރި އަންނަނިކޮށެވެ. ޔަހޫދީން އެ ސަރަހައްދުގައި ހިންގި މި އަނިޔާވެރި އަމަލުތަކާއި ގުޅިގެން ޣައްޒާގެ 30 މީހަކު ވަނީ ޝަހީދުވެފައެވެ.
ހަމާސްގެ މި ހަމަލާއާއި އެކު ހަނގުރާމަ ފެށުނީއްސުރެ މަރުވި ޔަހޫދީ ސިފައިންގެ އަދަދު މިވަނީ 600 އަށް ވުރެ މައްޗަށް އަރާފައެވެ.
ފާއިތުވި 24 ގަޑިއިރު ތެރޭގައި ޔަހޫދީން ޣައްޒާއަށް ދިން ހަމަލާތަކުގައި 41 މީހަކު ޝަހީދުކޮށްލާފައިވާއިރު، އޭގެ ތެރެއިން 5 ފަރާތަކީ ކުޑަ ކުދިންނެވެ.
Advertisement
This content is created and paid for by advertisers and does not involve Voice Journalists
