އިންޓަނޭޝަނަލް އެއިޑް ކެމްޕެއިން (އައިއޭސީ) އިން މިއަހަރުގެ އަޟްހާ އީދަށް ކަތިލާ އުޟްހިޔާތަކުގެ ހިއްސާއެއް ދަޅުތަކުގައި ބަންދުކޮށް ޣައްޒާއަށް ފޯރުކޮށްދިނުމުގެ މަސައްކަތް ފަށައިފިއެވެ.

އައިއޭސީން ބުނީ ޣައްޒާ އަށް ހާއްސަކޮށް ކަތިލެވޭ އުޟްހިޔާ ކަތިލުން ކުރިއަށް ދަނީ ދެކުނު އެފްރިކާ އާއި އިންޑިއާގައި ކަމަށާއި، އުޟްހިޔާގެ ގޮތުގައި ކަތިލެވެނީ ގެރި ކަމަށެވެ.

މިތަކެތީގެ 1800 ހިއްސާ ޣައްޒާ އަށް ފޯރުކޮށްދިނުމަށް ހަމަޖެހިފައިވާއިރު، ކޮންމެ ހިއްސާ އަކީ ގާތްގަނޑަކަށް 15 ކިލޯއެވެ. އަދި ކޮންމެ ހިއްސާއަކުން ގާތްގަނޑަކަށް 39 ދަޅު އުފެއްދޭއިރު، ކޮންމެ ދަޅެއްގައި 340 ގްރާމް ހުންނާނެ ކަމަށް އައިއޭސީން މައުލޫމާތު ދެއެވެ. މިފަދައިން އުޟްހިޔާ ބަންދު ކުރުމަށް ފަހު ޣައްޒާ އަށް އައިއޭސީން 70،200 ދަޅު ފޮނުމަށް ވަނީ ހަމަޖެހިފައެވެ.

Advertisement

އިންޑިއާ އާއި ދެކުނު އެފްރިކާގެ އިތުރުން ވެސް އައިއޭސީން މިއަހަރު މިސްރާއި ޗާޑާއި ސޯމާލިއާގައި ވެސް އުޟްހިޔާ ކަތިލަމުން އަންނައިރު، ޗާޑާއި ސޯމާލިއާ އަކީ ކުރިން އުޟްހިތާ ކަތިލުމަށް ހަމަޖެހިފައިވާ ތަންތަނަށް ނުވި ނަމަވެސް، އައިއޭސީން ބުނީ، ހީކުރި ވަރަށް ވުރެ ގިނަ އަދަދަކަށް އުޟްހިޔާ ލިބުމުގެ ސަބަބުން، އެ ދެ ގައުމުން އިތުރު ބަކަރި އާއި ކަންބަޅި ބަކަރި ހޯދައި އެކަން ކުރިއަށްދާ ކަމަށެވެ.

މިއަހަރު އުޟްހިޔާގެ ގޮތުގައި އައިއޭސީން ކަތިލާ ތަކެތި:

1) 409 ބަކަރި

2) 131 ކަންބަޅި ބަކަރި

3) 7 ޖަމަލު (49 ހިއްސާ)

4) 5 ގެރި (29 ހިއްސާ)

މި ތަކެތީގެ ޖުމްލަ ހިއްސާގެ އަދަދަކީ 2418 ކަމަށް އައިއޭސީން ބުނެއެވެ.