ޔޫރޯ 24 ގެ ގުރޫޕް އީގައި މިރޭ ކުޅެވުނު ފުރަތަމަ މެޗުގައި ރޫމޭނިއާ އަތުން 3-0 ގެ ނަތީޖާއަކުން ޔުކްރެއިން ބަލިވެއްޖެއެވެ.

މިދެޓީމު އެންމެ ފަހުން ކުޅުނު ތިން މެޗުންވެސް ޔުކުރެއިން މޮޅުވެފައިވާއިރު، މިއީ 2003 ވަނަ އަހަރުގެ ފަހުން ޔުކުރެއިން އަތުން ރޫމޭނިއާ މޮޅުވި ފުރަތަމަ ފަހަރެވެ.

މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ ޔުކްރެއިން މެޗު ޑޮމިނޭޓްކުރި ނަމަވެސް މިހާފުގައި އެޓީމަށް ރޫމޭނިއާގެ ގޯލާއި އަމާޒުކޮށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ. ނަމަވެސް މިހާފުގައި ރޫމޭނިއާ އިން ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފަ އެވެ.

އެގޮތުން ފުރަތަމަ ހާފުގެ 29 ވަނަ މިނެޓުގައި ޔުކްރެއިންގެ ކީޕަރު އަންދްރޭ ލުނިންއަށް ހެދުނު ގޯހެއްގެ ފައިދާ ނަގައި ރޫމޭނިއާގެ ކެޕްޓަން ނޮކޮލާއީ ސްޓެންޗޫ ވަނީ ލަނޑެއް ކާމިޔާބުކޮށް އެޓީމަށް ލީޑު ހޯދައިދީފައެވެ. މިއީ ޔުކްރެއިންގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ރޫމޭނިއާ ކުރީގައި އިވެގެންނެވެމ

މެޗުގެ ދެވަނަ ހާފު ވަރުގަދަކޮށް ފެށީ ރޫމޭނިއާ އިންނެވެ. ނަތީޖާއެއްގެ ގޮތުން ދެވަނަ ހާފުގެ 53 ވަނަ މިނެޓުގައި އެޓީމުން ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްފައެވެ. މިލަނޑު އެޓީމަށް ކާމިޔާބުކޮށްދިނީ މިޑްފީލްޑަރު ރަޒްވާން މެރިން. އެވެ.

މިއީ ޔުކްރެއިންގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. އަދި އޭގެ ހަތަރު މިނެޓުފަހުން އެޓީމުގެ ތިންވަނަ ލަނޑު ކާމިޔާބުކޮށްދިނީ ފޯވާޑް ޑެނިސް ޑްރާގުސް އެވެ. މިއީ އެޓީމުގެ ފޯވާޑް ޑެނިސް މޭން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މީގެ އިތުރުން ވެސް މިހާފުގައި ދެޓީމުންވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓިމަކަށް އިތުރު ލަނޑެއް ކާމިޔާބުނުކުރެވި 3-0 ގެ ނަތީޖާއަކުން ރޫމޭނިއާ ކުރީގައި އޮވެގެންނެވެ.