ޔޫރޯ 2024 ގެ ގުރޫޕް އީގައި މިރޭ ކުޅެވުނު ދެވަނަ މެޗުގައި 1-0 ގެ ނަތީޖާއަކުން ބެލްޖިއަމް ބަލިކޮށް ސްލޮވާކިއާ އިން މުބާރާތް ފެށީ ތާރީޚީ މޮޅަކާއެކު އެވެ.

މިދެޓީމު މީގެކުރިން ތިންފަހަރެއްގެ މަތިން ވާދަކޮށްފައިވާއިރު، އޭގެ ތެރެއިން އެއް މެޗުން ބެލްޖިއަމް މޮޅުވިއިރު، އަނެއް ދެމެޗު ނިމިފައިވަނީ އެއްވަރުވެގެންނެވެ. މީގެއިތުރުން މިއީ ސްލޮވާކިއާ އަތުން ބެލްޖިއަމް ބަލިވި ފުރަތަމަ މެޗެވެ.

މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ ބެލްޖިއަމް އިން މެޗު ޑޮމިނޭޓްކުރި ނަމަވެސް ފުރަތަމަ ހާފުގެ ވަރަށް ކުރީކޮޅު ސްލޮވާކިއާ އިން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު މެޗު ފެށިގެން ހަތްވަނަ މިނެޓުގައި އެޓީމަށް ކާމިޔާބުކޮށްދިނީ ތަޖުރިބާކާރު ފޯވާޑް އިވާން ޝަރާންޒް އެވެ.

މީގެ އިތުރުން ވެސް މިހާފުގައި ދެޓީމުންވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ސްލޮވާކިއާ ކުރީގައި އޮވެގެންނެވެ.

މެޗުގެ ދެވަނަ ހާފުގައި ބެލްޖިއަމް އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖައެއްގެ ގޮތުން ދެވަނަ ހާފުގެ 56 ވަނަ މިނެޓުގައި ބެލްޖިއަމްގެ ފޯވާޑް ލުކާކޫ ލަނޑެއް ކާމިޔާބުކޮށް އެޓީމަށް ނަތީޖާ އެއްވަރުކޮށްދިނެވެ.

ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއްކަމަށެވެ. އަދި މީގެ އިތުރުންވެސް މިހާފުގައި ބެލްޖިއަމްގެ ލިއަންޑްރޯ ޓްރޮސާޑްގެ އިތުރުން ޔޯހާން ބަކަޔޯކާ އަށް ވަނީ މެޗުގެ ނަތީޖާ އެއްވަރުކުރުމަށް ރަނގަޅު ހުސް ފުރުސަތުތަކެއްލިބި ބޭނުން ނުކުރެވިފައެވެ.

މީގެ އިތުރުން މެޗު ނިމެން ހަތަރު މިނެޓަށްވެފައި ވަނިކޮށް ލުކާކޫ އިތުރު ލަނޑެއް ކާމިޔާބުކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ ލުކާކޫ ލަނޑުޖެހުމަށް ފުރުސަތު ތަނަވަސްކޮށްދިން އޮޕެންޑާ ބޯޅަ ކޮންޓްރޯ ކުރުމުގެ ތެރޭގައި އޭނާގެ އަތުގައި ބޯޅަ ޖެހިފައިވާތީ އެއީ ރަނގަޅު ލަނޑެއް ނޫން ކަމަށެވެ. މިއާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ސްލޮވާކިއާ ކުރީގައި އޮވެގެންނެވެ.

މިނަތީޖާއެކު މިގުރޫޕުން ކޮންމެ ޓީމެއް އެއްމެޗު ކުޅެފައިވާއިރު، ގުރޫޕްގެ އެއްވަނާގައި ލަނޑުގެ ތަފާތުން މިވަގުތު އޮތީ މިރޭ 3-0 ގެ ނަތީޖައަކުން ޔުކްރެއިން ބަލިކުރި ރޫމޭނިއާ އެވެ. ދެވަނައިގައި ސްލޮވާކިއާ އޮތްއިރު، ބެލްޖިއަމް އޮތީ ތިންވަނައިގައެވެ. އަދި ގުރޫޕްގެ ފުލުގައި މިވަގުތު އޮތީ ޔުކްރެއިން އެވެ.