ޔޫރޯ 2024 ގެ ގުރޫޕް ޑީގައި މިރޭ ކުޅެވުނު ތިންވަނަ މެޗުގައި ފްރާންސާއި އޮސްޓްރިއާ ވާދަކުރި މެޗު 1-0 ގެ ނަތީޖާއަކުން ކާމިޔާބުކޮށް ފުރާންސުން މުބާރާތް ފެށީ މޮޅަކާއެކުގައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައި ލަނޑުޖަހާނެ ރަނގަޅު ފުރުސަތުތަކެއް ތަނަވަސްކުރީ ފުރާންސުންނެވެ. އަދި އެޓީމުން މެޗުގެ ލީޑު ހޯދީ ފުރަތަމަ ހާފުގެ 38 ވަނަ މިނެޓުގައެވެ.

މިލަނޑަކީ އެޓީމުގެ ފޯވާޑް ކިލިއަން އެމްބާޕޭ ގޯލު ކުރިމައްޗަށް ހުރަސްކޮށްދިން ބޯޅައެއއ، ދިފާއުކުރަން އުލުމުގެ ތެރޭގައި އޮސްޓްރިއާގެ ޑިފެންޑަރު މެކްސިމިލިއަން ވޫބާގެ ބޮލުގައި ޖެހިފައި ބައިކޮޅަށް ވަން ލަނޑެކެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ފުރާންސް ކުރީގައި އޮވެގެންނެވެ.

Advertisement

މެޗުގެ ދެވަނަ ހާފުގައި ވެސް ދެޓީމުގެ ފަރާތުން ވަރަށް ވާދަވެރި ކުޅުމެއް ގެނިގެންދިޔައިރު، މިހާފުގައި ދެޓީމުންވެސް ވަނީ ލަނޑު ޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ދެޓީމަށް ވެސް ލިބުނު ފުރުސަތުތަކުގެ ބޭނުން ނުކުރެވި މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ފުރާންސް ކުރީގައި އޮވެގެންނެވެ.

މިގުރޫޕްގައި ކޮންމެ ޓީމަކުން އެއްމެޗު ކުޅެފައިވާއިރު، ޖެހި ލަނޑުގެ ތަފާތުން ގުރޫޕްގެ އެއްވަނާގައި މިވަގުތު އޮތީ ނެދަލޭންޑްސް އެވެ. ދެވަނައިގައި ފްރާންސް އޮތްއިރު، ތިންވަނައިގައި އޮތީ ޕޮލެންޑެވެ. އަދި މިމެޗުން ބަލިވި އޮސްޓްރިއާ މިވަގުތު އޮތީ ގުރޫޕްގެ ފުލުގައެވެ