ޣައްޒާގެ ދެކުނުގައި ހައްދުފަހަނައަޅާފައިވާ ޔަހޫދީ ފައުޖުން ހިންގަމުން އަންނަ ގަތުލުއާއްމު ކޮންމެ ދުވަހެއްގެ ވެސް ވަކި ވަގުތަކަށް ހުއްޓާނެ ކަމަށް އެމީހުން ބުނެފިއެވެ.

މިއީ ޣައްޒާގެ ހާލުގައި ޖެހިފައިވާ ރައްޔިތުންނަށް އިންތިހާ އަށް ބޭނުންވެފައިވާ އިންސާނީ އެހީ ވެއްދުމުގެގޮތުން އެޅި ފިޔަވަޅެއް ކަމަށް ޔަހޫދީން ބުނެފައިވާއިރު، އެމީހުންގެ މި ނިންމުމުގެ ފަހަތުގައިވާ ނިޔަތާއި މެދު އެތައް ބަޔަކު އަންނަނީ ސުވާލު އުފައްދަމުންނެވެ.

ޔަހޫދީންގެ ހަމަލާތައް ކޮންމެ ދުވަހަކުވެސް ހުއްޓާލުމަށް ނިންމާފައިވަނީ ޣައްޒާގެ ގަޑިން ހެނދުނު 8:00 އިން ރޭގަނޑު 19:00 އަށެވެ.

Advertisement

މި ވަގުތު ކޮޅުގެ ތެރޭގައި ޣައްޒާއާއި އިސްރާއީލާއި ދެމެދު އޮންނަ ކަރެމް ޝަލޮމް ބޯޑަރު ކައރީގައި ހިނގާ ހަމަލާތައް ހުއްޓާލައި އެހީ ވެއްދުމަށް ހުޅުވާލި ނަމަވެސް،  އެމީހުންވަނީ ދާއިމީ ކޮށް ހަނގުރާމަ ހުއްޓާލުމާއި ރަފާހް ގައި ހިންގާ އުދުވާންތައް ހުއްޓުމަށް ދެކޮޅު ހަދާފައެވެ.

މިކަމާއި ގުޅިގެން އދ ގެ ތަރުޖަމާނަކު ވިދާޅުވީ، ޔަހޫދީން މިފަދައިން ނިންމި ނަމަވެސް ޣައްޒާއަށް އެހީ އެތެރެކުރެވިފައިނުވާ ކަމަށެވެ.

މީގެ އިތުރުންވެސް، ޣައްޒާއަށް އިންސާނީ އެހީ ފޯރު ކޮށްދިނުމަށް މަސައްކަތް ކުރާ ޖަމިއްޔާއެއް ކަމަށްވާ އެކްޝަންއެއިޑް އިން ބުނީ މިކަމުގެ ސަބަބުން ޣައްޒާ އަށް އިތުރު އެހީ ވެއްދުމަށް މަގުފަހި ވެގެން ދިޔަ ނަމަވެސް، މި ނިންމުމާއި ގުޅޭ ތަފްސީލު ޔަހޫދީން މިހާތަނަށް ހިއްސާކޮށްފައި ނުވާ ކަމަށެވެ.

ފާއިތުވި އަހަރުގެ އޮކްޓޫބަރު މަހުގެ 7 ވަނަ ދުވަހު ޔަހޫދީން ޣައްޒާ އަށް އަރައިގަނެ، ހަމަލާތައް ވަރުގަދަކޮށްފައިވާއިރު، އެމީހުން ވަނީ ޣައްޒާ އަށް އެހީ ވެއްދޭނެ ހުރިހާ އެއްގަމު މަގުތަކާއި ބޯޑަރުތަކެއްގެ ކޮންޓްރޯލް ނަގާފައެވެ. މިކަމާއި ގުޅިގެން ޣައްޒާގެ ރައްޔިތުންނަށް ބޭނުންވާ ކާބޯތަކެތި ނުލިބި އެތައް ބަޔަކު ބަނޑުހައިހޫނު ކަމުގެ ވޭނުގައި ޝަހީދުވަމުންދާއިރު، އެހެނިހެން އިންސާނީ އެހީތެރިކަމުން ވެސް އެމީހުން ވަނީ މަހުރޫމް ވެފައެވެ.