މަސްތުވާތަކެތީގެ ބާވަތެއް ކަމަށްވާ ކެނެބިސް ގިނަ އަދަދަކަށް ޓްރެފިކް ކުރި މީހަކަށް 25 އަހަރުގެ ޖަލު ހުކުމަކާއިއެކު އެއްލައްކަ ރުފިޔާގެ ޖޫރިމަނާ އެއް ކްރިމިނަލް ކޯޓުން އިއްވައިފިއެވެ.

ކްރިމިނަލް ކޯޓުން މި ހުކުމް އިއްވާފައިވަނީ މުޙައްމަދު ލަމްޢާން ޞަބާޙް، މ.އިރާކުމާގެ، މާލެ މައްޗަށެވެ.

ކޯޓުން އިއްވި ހުކުމްގައި ބުނީ، 2023 ވަނަ އަހަރުގެ އޮގަސްޓް މަހުގެ 31 ވަނަ ދުވަހުގެ 21:14 ހާއިރު ކޯޓް އަމުރެއްގެ ދަށުން ފުލުހުން ލަމްޢާން ހައްޔަރުކޮށް، އޭނާ ދިރިއުޅޭ ހ.ދިއްގާމާގޭގެ ތިން ވަނަ ފަންގިފިލާ ބަލާ ފާސްކުރި ކަމަށެވެ.

ހަމައެއާއިއެކު، އޭނާ ދިރިއުޅޭ ކޮޓަރީގައި މަސްތުވާތަކެތި ހުންނާނެތޯ ސުވާލުކުރުމުން މަސްތުވާތަކެތި ހުންނާނެ ކަމަށް އެއްބަސްވި ކަމަށާއި، އޭނާ އިޝާރާތްކުރި ކަބަޑުގެ ތެރެއިން 6 ރަބަރު ކޮތަޅު އޮތް ކަމަށާއި، އެއިން ކޮންމެ ކޮތަޅެއްގައި މަސްތުވާތަކެތި ކަމަށް ޝައްކު ކުރެވޭ 15 ސެލޯފިން ކޮޅު އޮތް ކަމަށެވެ. 

ޖުމްލަ 90 ސެލޯފިން ކޮޅުގައި 52.0300 ގްރާމްގެ ކެނެބިސް ހުރިކަމަށް މަސްތުވާތަކެތި ތަހުލީލު ތަކުން ދެއްކި ކަމަށާއި، އޭގެ އިތުރުންވެސް ފެނުނު އެ ކޮތަޅުގެ ތެރެއިން ފެނުނު ސިޓީ އުރައެއްގެ ތެރެއިން 9 ރަބަރު ޕެކެޓް ފެނުނު ކަމަށާއި، މިއިން ކޮންމެ ޕެކެޓެއްގައ މަސްތުވާތަކެތި ކަމަށް ޝައްކު ކުރެވޭ 25 ސެލޯފިން ކޮޅު އޮތް ކަމަށާއި، ޖުމްލަ 225 ސެލޯފިންކޮޅުގައި 138.6250 ގްރާމް ކެނެބިސް ހުރިކަމަށެވެ.

ހަމައެއާއިއެކު، އެ ކޮތަޅުން 4 ރަބަރު ޕެކެޓު ފެނުނު ކަމަށާއި، މިއިން ކޮންމެ ޕެކެޓެއްގައި މަސްތުވާތަކެތި ކަމަށް ޝައްކުކުރެވޭ 15 ސެލޯފިން ކޮޅު އޮތް އިރު، ޖުމްލަ 60 ސެލޯފިންކޮޅުގައި 30.1200 ގްރާމް ކެނެބިސް ހުރި ކަމަށެވެ.

އެއާއިއެކު، އޭނާގެ މައްޗަށް ކުރި ދައުވާއަށް އޭނާ އިންކާރުކުރިއިރު، އެއީ އޭނާގެ ބޭބެއާއި ބޭބެގެ އަންހެނުން ބެހެއްޓި އެއްޗެހި ކަމަށްވަނީ ބުނެފައެވެ.

އެހެންނަމަވެސް، އޭނާގެ މައްޗަށް ދައުވާ ސާބިތުވެ، ކްރިމިނަލް ކޯޓުން ވަނީ އޭނާގެ މައްޗަށް 25 އަހަރުގެ ޖަލު ހުކުމެއް ކަނޑައެޅުމުގެ އިތުރުން 1 ލައްކަ ރުފިޔާ އަށް ޖޫރިމަނާކޮށްފައެވެ. އަދި ޖޫރިމަނާއަށް ވާ ފައިސާ 13 މަސްދުވަހުގެ ތެރޭގައި ދެއްކުމަށް  ލަމްޢާން ގެ މައްޗަށް ކްރިމިނަލް ކޯޓުން ވަނީ ހުކުމްކޮށްފައެވެ.