ޔުއެފާ ޔޫރޯ 2024 ގެ ގުރޫޕް އެފްގައި މިރޭ ކުޅެވުނު ތިންވަނަ މެޗުގައި ޗެކް ރިޕަބްލިކް ލަނޑެއް ކާމިޔާބުކޮށް ލީޑު ހޯދާފައިވަނިކޮށް ފަހަތުން އަރައި ދެލަނޑު ކާމިޔާބުކޮށް 2-1 ގެ ނަތީޖާއަކުން މޮޅުވެ ޕޯޗުގަލް އިން މުބާރާތުގެ ފެށުން ރަނގަޅުކޮށްފިއެވެ.

މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ މެޗު ޑޮމިނޭޓްކުރީ ޕޯޗުގަލް އިންނެވެ. އަދި މިހާފުގައި އެޓީމުގެ ކެޕްޓަން ކްރިސްޓިއާނޯ ރޯނާލްޑޯއަށް ވަނީ މެޗުގެ ލީޑު ހޯދުމަށް ރަނގަޅު ތިން ފުރުސަތެއް ލިބި ބޭނުން ކުރެވޭގޮތް ނުވެފައެވެ.

އޭގެތެރެއިން ފުރަތަމަ ފުރުސަތުގައި ރޮނާލްޑޯ ބޮލުން ފޮނުވާލި ހަމަލާ ގޯލާއި އަމާޒުނުވެދިޔައިރު، ފަހު ދެފުރުސަތުގައި ރޮނާލްޑޯ މުޅިން ހުސްކޮށްހުރެ ފޮނުވާލި ދެ ހަމަލާވެސް ޗެކްގެ ކީޕަރު ވަނީ ހުޝިއާރުކަމާއެކު ދިފާއުކޮށްފައެވެ. މިއާއެކު ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބުނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

Advertisement

މެޗުގެ ދެވަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެ ކުޅެ މެޗު ޑޮމިނޭޓްކުރީ ޕޯޗުގަލް އިންނެވެ. ނަމަވެސް މިހާފުގައި ޗެކް ރިޕަބްލިކް އިން ވަނީ އެޓީމުގެ ޕްރެސިން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ.

ނަތީޖާއެއްގެ ގޮތުން ދެވަނަ ހާފުގެ 62 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ މިޑްފީލްޑަރު  ލޫކަސް ޕްރޮވޯޑެވެ. މިއީ އެޓީމުގެ ޑިފެންޑަރު ވްލަޑިމިއާ ކާފަލް ތަނަވަސްކޮށްދިން ފުރުސަތެއްގައި ޕޯޗުގަލްގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ މަތީ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ހިތްގައިމު ލަނޑެކެވެ.

ނަމަވެސް އޭގެ ހަތް މިނެޓު ފަހުން ޕޯޗުގަލް އިން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑަކީ ޕޯޗުގަލްގެ ޑިފެންޑަރު ނޫނޯ މެންޑޭޒް ބޮލުން ގޯލު ކުރިމަށް ހުރަސްކޮށްދިން ބޯޅައެއް ޗެކްގެ ކީޕަރު ދިފާއުކުރަން އުޅުމުގެ ތެރޭގައި ކުރިމަތީގައިހުރި އެޓީމު ޑިފެންޑަރު ރޮބިން ހްރަނަކް ފައިގައި ޖެހިފައި ބައިކޮޅަށް ވަން ލަނޑެވެ.

މީގެއިތުރުން ފަހުހާފުގެ 87 ވަނަ މިނެޓުގައި ޕޯޗުގަލްގެ ފޯވާޑް ޑިއޭގޯ ޖޯޓާ އެޓީމަށް ލަނޑެއް ކާމިޔާބުކުރި ނަމަވެސް ވިއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ. އަދި ޕޯޗުގަލް މިމެޗުން މޮޅުވި ލަނޑު މެޗުގެ އިތުރު ވަގުތުގެތެރޭގައި ކާމިޔާބުކޮށްދިނީ ފަހުހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނުކުތް ޒުވާން ފޯވާޑް ފްރެންސިސްކޯ ކޮންސެސާއޮ އެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ޕޯޗުގަލް ކުރީގައި އޮވެގެންނެވެ.