ަދައުލަތުގެ ބަޖެޓުން، ކޮންމެ އަހަރަކުވެސް ސިޔާސީ ޕާޓީތަކަށް ބޮޑު އަދަދުން ފައިސާދޭއިރު، އެ ޕާޓީތަކުން ކުރާ މަސައްކަތްތައް އިލެކްޝަންސް ކޮމިޝަން،އީސީ އިން ބަލާ ކަމަށް އެ ކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.

ދައުލަތުގެ ބަޖެޓުން 6 ސިޔާސީ ޕާޓީއަކަށް ފައިސާ ދޫކޮށްފައިވާކަން އީސީން ހާމަކުރުމާއެކު ގިނަ ބަޔަކު އަންނަނީ ޕާޓީތަކުން ފައިދާ ހުރި ކަމެއް ނުކުރާއިރު ފައިސާ ދެމުންދާ ކަމަށް ބުނެ ނުރުހުން ފާޅު ކުރަމުންނެވެ. 

އެވާހަކަތަކަށް ރައްދު ދެއްވައި ފުއާދު އެކްސްގައި ކުރެއްވި ޕޯސްޓެއްގައި ވިދާޅުވީ، 2022 ވަނަ އަހަރުން ފެށިގެން، ކޮންމެ އަހަރަކުވެސް ޕާޓީތަކުގެ އޮފީހަށް އީސީގެ ޓީމަކުން ގޮސް، ލިޔެކިޔުންތަކާއި އެ ޕާޓީތަކަށް ކުރެވިފައުވާ  މަސައްކަތްތައް ބަލާ ކަމަށެވެ.  

އިލެކްޝަންސް ކޮމިޝަނުން އިއްޔެ ބުނެފައުވާ ގޮތުން، ފައިސާ ދޫކޮށްފައިވަނީ ރެޖިސްޓަރ ކޮށްފައިވާ 10 ޕާޓީގެ ތެރެއިން 10،000 މެންބަރުން ހަމަވާ، އެމްޑީޕީ، ޕީޕީއެމް، ޖުމްހޫރީ ޕާޓީ، އެމްޑީއޭ، ޕީއެންސީ އަދި އަދާލަތު ޕާޓީއަށް ކަމަށެވެ.

ޕާޓީތަކަށް ފައިސާ ދޫކުރި އަދަދުތައް:

• މޯލްޑިވިއަން ޑިމޮކްރެޓިކް ޕާޓީ(އެމްޑީޕީ): 15.1 މިލިއަން ރުފިޔާ

• ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް): 10.4 މިލިއަން ރުފިޔާ

• ޖުމްހޫރީ ޕާޓީ (ޖޭޕީ): 5.3 މިލިއަން ރުފިޔާ

• މޯލްޑިވްސް ޑިވެލޮޕްމެންޓް އެލަޔަންސް(އެމްޑީއޭ): 2.4 މިލިއަން ރުފިޔާ

• ޕީޕަލްސް ނޭޝަނަލް ކޮންގްރެސް (ޕީއެންސީ): 8.0 މިލިއަން ރުފިޔާ

• އަދާލަތު ޕާޓީ: 2.5 މިލިއަން ރުފިޔާ

އިލެކްޝަންސް ކޮމިޝަނުން ބުނެފައިވާ ގޮތުން، މި ޕާޓީތަކަށް ފައިސާ ކަނޑައަޅާފައިވަނީ ބޮލަކަށް 289.62 ރުފިޔާގެ މަގުންކަމަށެވެ. އެއީ ޖުމުލަ 152،266 މެންބަރުންނަށް ކަމަށްވާއިރު، މިއަހަރުގެ ބަޖެޓުން 6 ސިޔާސީ ޕާޓީއަށް 44.09 މިލިއަން ރުފިޔާ ދޫކުރުމަށް ވަނީ ބަޖެޓްކޮށްފައެވެ. 

ސިޔާސީ ޕާޓީތަކުގެ ޤާނޫނުގައިވާގޮތުން ދައުލަތުގެ ބަޖެޓުން ފައިސާ ދޫކުރާނީ، ރައްޔިތުންގެ މަޖިލީހުން ބަޖެޓް ފާސްކުރާ ދުވަހާ ހަމަޔަށް އެ ޕާޓީއެއްގެ މެންބަރުންގެ ދަފްތަރުގައި 10،000 މީހުން ހަމަވާ ޕާޓީތަކަށެވެ. ސިޔާސީ ޕާޓީތަކަށް ދޫކުރާނީ އެ އަހަރަކަށް ފާސްކުރާ ބަޖެޓުގެ 0.01 އިންސައްތައަށްވާ ފައިސާކަމަށްވެސް ޤާނޫނުގައި ބަޔާންކުރެއެވެ.