ފަލަސްތީނުގެ ޣައްޒާއަށް އިންސާނީ އެހީ ވެއްދުމަށް ޔަހޫދީން ކުރިމަތިކުރުވަމުންދާ ދަތިކުރުންތަކުގެ ސަބަބުން، ބަނޑުހައިހޫނު ކަމުގެ ސަބަބުން ޣައްްޒާގެ 35،000 ކުޑަކުދިން މަރުގެ ތުންފަތްމަތީގައި ތިބި ކަމުގެ އިންޒާރު ޣައްޒާގެ ލޯކަލް އޮތޯރިޓީ ތަކުން ދީފިއެވެ.

ޣައްޒާގައި ހުންނަ އެގައުމުގެ ސަރުކާރުގެ މީޑިއާ އޮފީހުން ބުނީ ޣައްޒާ އަށް އެހީ ވެއްދުމަށް އެމެރިކާ އާއި އިސްރާއީލުން އަޅާފައިވާ ދަތިކުރުންތަކުގެ ސަބަބުން ބަނޑުހައިހޫނު ކަމުގެ ދުވަސްވަރަކަށް ޣައްޒާ އަވަސް ސްޕީޑެއްގައި މިސްރާބު ޖަހާފައިވާ ކަމަށެވެ.

މީޑިއާ އޮފީހުން ބުނީ ސިއްހަތަށް ފައިދާ ހުރި ކާނާ ނުލިބުމުގެ ސަބަބުންނާއި ރަނގަޅު ސިއްހީ ފަރުވާގެ ތެރެއިން ހާއްސަކޮށް ވެކްސިން ނުލިބުމުގެ ސަބަބުން އެތައް ކުޑަކުދިންނެއް ބަނޑުހައިހޫނު ކަމާއި ބަލިމަޑުކަމުގެ ވޭން ތަހައްމަލު ކުރަމުންގެންދާ ކަމަށެވެ.

Advertisement

އެއާއިއެކު، މީޑިއާ އޮފީހުން ވަނީ ޣައްޒާ އަށް ދަތިކުރުމުގެ ގަޮތުން ހައްދުފަހަނައަޅާފައިވާ އިސްރާއީލުން އަޅާފައިވާ ފިޔަވަޅުތައް އުވާލައި، ވީހާވެސް އަވަހަށް ޣައްޒާގެ ރައްޔިތުންނަށް އިންސާނީ އެހީ ފޯރުކޮށްދިނުމުގެ މަގު ފަހިކޮށްދިނުމަށް  ގޮވާލާފައެވެ.

މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ޔަހޫދީ ފައުޖުން މެދުކެނޑުމެއްނެތި ޣައްޒާގައި ހިންގަމުން އަންނަ ގަތުލުއާއްމުގެ ސަބަބުން 37,350 އަށް ވުރެ ގިނަ މީހުން ޝަހީދުވެފައިވާއިރު، 85,400 އަށް ވުރެ ގިނަ މީހުން ވަނީ ޒަހަމްވެފައެވެ.

ޔަހޫދީންގެ ލާއިންސާނީ އަމަލުތަކާއި ހަމަލާތަކާއި ގުޅިގެން ޝަހީދުވި މީހުންނާއި ޒަހަމްވި މީހުންގެ ތެރޭގައި ގިނައީ ކުޑަކުދިންނާއި އަންހެނުންކަން ފާހަގަކޮށްލަން ޖެހެއެވެ.