ފަހަކަށް އައިސް މުޖުތަމައުގައި ކުށްކުރުން އިތުރުވެފައިވަނީ އެއްވެސް ހަމައެއް ނެތި ކުށްވެރިން މުޖުތަމައުއަށް ދޫކޮށްލުމުން ކަމަށް މޯލްޑިވްސް ޕޮލިސް ސާވިސްގެ ތަރުޖަމާނު އަދި ޗީފް ސްޕްރިންޓެންޑެންޓް އޮފް ޕޮލިސް އަޙްމަދު ޝިފާން ވިދާޅުވެއްޖެއެވެ.
"މާލޭގައި ވަގުންގެ ބޮޑު ނެޓްވޯކެއް، ހުއްޓުވޭނެ ގޮތެއް ނެތް!" މި ސުރުހީގައި ލިޔެފައިވާ ރިޕޯޓެއް އެކްސް ގައި ހިއްސާ ކުރައްވަމުން ޝިފާން ވިދާޅުވީ، މާލޭގައި ކުށްކުރުން އިތުރުވެފައިވާ ވާހަކައަކީ ހިތި ހަގީގަތެއް ކަމަށެވެ.
ޝިފާން ވިދާޅުވި ގޮތުގައި މިކަމުގެ އެއް ސަބަބަކީ މީގެ 10 ވަރަކަށް މަސް ކުރިން މޯލްޑިވްސް ކަރެކްޝަނަލް ސާވިސް އިން މޮނިޓާކުރެވޭނެ ހަރުދަނާ ނިޒާމެއް ނެތި 434 ކުށްވެރިން މުޖުތަމައު އަށް ދޫކޮށްލުމެވެ.
ހަމައެއާއިއެކު، ފުލުހުންގެ އިންފްރާސްޓްރަކްޗާ ތަރައްގީކޮށް ވަރުގަދަކުރުމަށްޓަކައި ފާއިތުވެދިޔަ އަހަރުތަކުގެ ތެރޭގައި މަސައްކަތްކޮށްފައިނުވުމަކީ ވެސް މިކަން ހައްލު ކުރުމަށް ކުރިމަތިވެފައިވާ ދަތިކަމެއްކަން ޝިފާން ފާހަގަކުރެއްވިއެވެ.
"އަޅުގަނޑުމެން މި ތިބީ ވަރަށް ބޮޑު ދަތިކަމެއްގެ ތެރޭގައި،"
ޝިފާން ވިދާޅުވިއެވެ.
ފާއިތުވެދިޔަ ދުވަސްތަކުގައި މާލެ ސަރަހައްދުގައި ކުށްކުރުމުގެ މައްސަލަތައް އިތުރުވެފައިވާއިރު، އޭގެ ތެރެއިން ވައްކަމާއި ފޭރުމުގެ މައްސަލަތައް ގިނަ ކަން ފާހަގަކޮށްލަން ޖެހެއެވެ.
މިގޮތުން ހުޅުމާލެ ދެވަނަ ފިޔަވަހީގައި ހިޔާ ފްލެޓެއްގެ އެޕާޓްމެންޓަށް މީހުން ގެންގޮސް ބިރުދައްކައިގެން ފޭރުމާއި، އެމްއޭސީއެލްގެ ވެހިކަލް ވަގަށް ނެގި މައްސަލަ ތަހުގީގު ކުރަނިކޮށް ފުލުހުންނަށް ހާމަވެގެންދިޔަ އުޅަނދުތައް ވަގަށް ނަގައި ވިއްކުމުގެ ނެޓްވޯކާއި ފިހާރަތަކާއި ގޭގެއަށް ވަދެ ވައްކަން ކުރާ މައްސަލަތައް ވެސް އޭގެ ތެރޭގައި ހިމެނެއެވެ.
Advertisement
This content is created and paid for by advertisers and does not involve Voice Journalists
