ޖަރުމަނުގައި މިހާރު ކުރިއަށްދާ ޔުއެފާ ޔޫރޯ 2024 ގެ ގުރޫޕް އޭގައި ސްވިޒަލޭންޑާއި ސްކޮޓްލޭންޑް ވާދަކުރި މެޗު 1-1 ގެ ނަތީޖާއަކުން އެއްވަރުވެ ސްވިޒަލޭންޑުން މުބާރާތުގެ ދެވަނަ ބުރުގެ ފުރުސަތު ބޮޑުކޮށްފިއެވެ.

މުބާރާތުގައި ސްކޮޓްލޭންޑުން ކުޅުނު ފުރަތަމަ މެޗުގައި 5-1 ގެ ތަފާތުބޮޑު ނަތީޖާއަކުން ޖަރުމަނު އަތުން އެޓީމު ބަލިވެފައިވާއިރު، ސްވިޒަލޭންޑްގެ ފުރަތަމަ މެޗުގައި އެޓީމުން ވަނީ 3-1 ގެ ނަތީޖާއަކުން ހަންގޭރީ ބަލިކޮށްފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ ސްކޮޓްލޭންޑުން ނެވެ. މިލަނޑު ފުރަތަނަ ހާފުގެ 13 ވަނަ މިނެޓުގައި ކާމިޔާބުކޮށްދިނީ އެޓީމުގެ މިޑްފީލްޑަރު ސްކޮޓް މެކްޓޮމިނޭ އެވެ. ސްވިޒަލޭންޑުގެ ޕެނަލްޓީ އޭރިއާ ތެރެއިން ލިބުނު ފުރުސަތެއްގައި މެކްޓޮމިނޭ ކުރިއަށް ފޮނުވާލި ބޯޅަ ގޯލަށް ވަނީ ކުރިމަތީގައި ހުރި ސްވިޒަލެންޑްގެ ފަބިއަން ޝާ ފައިގައި ޖެހިފައެވެ.

ސްވިޒަލެންޑުން ނަތީޖާ އެއްވަރުކުރީ ފުރަތަމަ ހާފުގެ 26 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ތަޖުރިބާކާރު މިޑްފީލްޑަރު ޒާޑަން ޝަކީރީ އެވެ. މިއީ ސްކޮޓްލޭންޑުގެ ފަހަތުން ހެދުނު ގޯހެއްގެ ފައިދާނަގައި ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ މަތީކަނަށް އަމާޒުކޮށްލައިގެން އޭނާ ކާމިޔާބުކޮށްދިން ހިތްގައިމު ލަނޑެކެވެ. އަދި މިލަނޑާއެކު އޭނާ ވެގެންގޮސްފައި ވަނީ މިމުބާރާތް ހިމެނޭހެން އެންމެ ފަހުގެ ތިން ވޯލްޑް ކަޕާއި އެންމެ ފަހު ތިން ޔޫރޯގައި ލަނޑުޖެހި ހަމައެކަނި ކުޅުންތެރިއާއަށެވެ.

މީގެ އިތުރުން ފުރަތަމަ ހާފުގެ 34 ވަނަ މިނެޓުގައި ސްވިޒަލެންޑުން އިތުރު ލަނޑެއް ކާމިޔާބުކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއްކަމަށެވެ. މިއާއެކު ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި ވެސް ދެޓީމުގެ ފަރާތުން ފޯރިގަދަ ކުޅުމެއަ ފެނިގެންދިޔައިރު، މިހާފުގައި ދެޓީމުންވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ.

އެގޮތުން ދެވަނަ ހާފުގެ 67 ވަނަ މިނެޓުގައި ސްވިޒަލޭންޑްގެ ޕެނަލްޓީ އޭރިއާ ބޭރުން ލިބުނު ހިލޭޖެހުމެއްގައި ސްކޮޓްލެންޑްގެ ކެޕްޓަން އެންޑްރޫ ރޮބާޓްސަން ގޯލު ކުރިމައްޗަށް ހުރަސްކޮށްދިން ބޯޅަ އެޓީމުގެ ގްރާންޓް ހަންލޭ ބޮލުން ފޮނުވާލުމުން އަމާޒުވީ ގޯލުގެ އަރިމަތީ ދަނޑިއަށެވެ.

މީގެ އިތުރުން ދެވަނަ ހާފުގެ 83 ވަނަ މިނެޓުގައި ސްވިޒަލެންޑް ފޯވަޑް ބްރީލް އެމްބޯލާ ލަނޑެއް ކާމިޔާބުކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއްކަމަށެވެ. އަދި މިއާއެކު މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މިނަތީޖާއެކު ކުޅުނު ދެމެޗުން ސްވިޒަލޭންޑަށް ހަތަރު ޕޮއިންޓް ލިބިފައިވާއިރު، އެޓީމު މިވަގުތު އޮތީ ގުރޫޕްގެ ދެވަނައިގައެވެ. އަދި މިމެޗުން ލިބުނު އެއް ޕޮއިންޓާއެކު ސްކޮޓްލޭންޑަށް ދެމެޗުން އެއްޕޮއިންޓް ލިބިފައިވާއިރު، އެޓީމު މިވަގުތު އޮތީ ގުރޫޕްގެ ތިންވަނައިގައެވެ.