ބަރަކާތްތެރި އަޟުޙާ ޢީދު ފާހަގަކުރުމަށް އދ. ދަނގެތީގައި ކުރިއަށްގެންދާ ހަރަކާތްތަކުގެ ތެރެއިން، ބޭއްވުނު ވާދެމުމުގެ މުބާރާތުގެ ސީނިއަރ ގުރޫޕް ސްޓޭޖްގެ ޗެންޕިއަން ޓީމަށް ލިބުނު ފައިސާ ފަލަސްތީނުގައި ހާލުގައި ޖެހިފައިވާ ފަރާތްތަކަށް އެހީވުމަށް ހަދިޔާ ކޮށްފިއެވެ. 

ބަރަކާތްތެރި އަޟުޙާ ޢީދު އިސްލާމީ ރިވެތި އުސޫލުތަކާއި އެއްގޮތަށް ފާހަގަކުރުމަށް، ދަނގެތީ ޖަމިއްޔަތުލް ޤަލަމުން އިސް ނަގައިގެން ކުރިއަށް ގެންދާ ޢީދު އުފާ ހަރަކާތްތަކުގެ ތެރެއިން ވާދެމުމުގެ މުބާރާތް ބާއްވާފައި ވަނީ އަންގާރަ ދުވަހުއެވެ. އެ މުބާރާތުގެ ސީނިއަރ ގޮފިން އެއްވަނަ ހޯދާފައިވަނީ ވޭތުވެދިޔަ ފަސް އަހަރުގެވެސް ޗެމްޕިއަން ޓީމް، ޓީމް ފަތަހަ އެވެ. 

ޗެންޕިއަން ޓީމަށް 5000 ރުފިޔާގެ ފައިސާގެ އިނާމު ދީފައިވާއިރު ފަތަހަ ޓީމަށް އެ ލިބުނު ހުރިހާ ފައިސާއެއް ފަލަސްތީނަށް ވަނީ ހަދިޔާ ކޮށްފައެވެ. 

ބީއެމްއެލް އިސްލާމިކް ދަނގެތީ ޢީދު އުފާ 1445ގެ ވާދެމުމުގެ މުބާރާތުގެ ދެވަނައަށް ގޮސްފައިވާ ޓީމަށް 3000 ރުފިޔާގެ ފައިސާގެ އިނާމު ދީފައިވާއިރު، ތިންވަނައަށް ދިޔަ، ޓީމަށް 1000 ރުފިޔާގެ ފައިސާގެ އިނާމް ވަނީ ހަވާލުކޮށްފައެވެ.

ވާދެމުމުގެ މުބާރާތުގެ އިތުރުން ޢީދު ފާހަގަކުރުމަށް އިއްޔެ ވަނީ މަސްރޭހެއްވެސް ކުރިއަށް ގެންގޮސްފައެވެ. ޖުމުލަ 16 ޓީމު ބައިވެރިވި އެ މަސްރޭހުގެ އެއްވަނައަށް ދިޔައީ ޓީމް ބަރިކެނޑިއެވެ. 

ދަނގެތި ޢީދު އުފާ ހަރަކާތްތައް ނިންމާލުމަށް ބާއްވާ އެންމެ ފަހުގެ ހަރަކާތް، ރައްޔިތުންގެ ބާބެކިޔު ބޭއްވުމަށް ހަމަޖެހިފައުވަނީ މިރޭއެވެ. މި ބާބެކިޔުގައި، ޢީދު އުފާ އިވެންޓްގެ ބޮޑު އިނާމް، ނަވާ ހައްޖު އެންޑް އުމްރާ ގުރޫޕުންދޭ އުމްރާ ދަތުރު ލިބޭ ފަރާތް އިއުލާން ކުރެވިގެންދާނެއެވެ.