ޔުއެފާ ޔޫރޯ 2024 ގެ ގުރޫޕް ސީގައި މިރޭ ކުޅެވުނު ފުރަތަމަ މެޗުގައި، ފަހުވަގުތު ކާމިޔާބުކުރި ލަނޑާއެކު ސާބިއާ އިން ސްލޮވޭނިއާ މޮޅުވިޔަނުދީ ހިފަހައްޓައިފިއެވެ.

މުބާރާތުގައި ސާބިއާ އިން ކުޅުނު ފުރަތަމަ މެޗުގައި 1-0 ގެ ނަތީޖާއަކުން އިންގްލޭންޑް އަތުން އެޓީމު ބަލިވެފައިވާއިރު، ސްލޮވޭނިއާގެ ފުރަތަމަ މެޗުގައި ޑެންމާކާއި ވާދަކޮށް 1-1 ގެ ނަތީޖާއަކުން ދެޓީމު ވަނީ އެއްވަރުވެފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު ފުރަތަމަ ހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އެގޮތުން މިހާފުގައި ސްލޮވޭނިއާ އިން އެންމެ ހުސް ފުރުސަތެއް ލިބުނީ ފުރަތަމަ ހާފުގެ 38 ވަނަ މިނެޓުގައި އެޓީމުގެ ޓިމީ އެލްސްނިކް އަށެވެ. ނަމަވެސް އޭނާ ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ. އަދި ދަނޑީގައި ޖެހިފައި ނުކުތް ބޯޅަ މުޅިން ހުސްކޮށް ހުރެ އެޓީމުގެ ބެންޖަމިން ސެސްކޯ ކުރިއަށް ފޮނުވާލި ނަމަވެސް އެބޯޅަ ގޯލާއި އަމާޒުކުރެވޭ ގޮތެއްނުވިއެވެ.

މިއާއެކު ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި ވެސް ދެޓީމުގެ ފަރާތުން ފޯރިގަދަ ކުޅުމެއް ފެނިގެން ދިޔައިރު، މިހާފުގައި ދެޓީމުންވެސް ވަނި ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އެގޮތުން ސާބިއާއަށް ލިބުނު ފުރުސަތުތަކުގެ ބޭނުންނުކުރެވިދިޔައިރު، ސްލޮވޭނިއާ އިން ވަނީ ދެވަނަ ހާފުގެ 69 ވަނަ މިނެޓުގައި ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ.

މިލަނޑު އެޓީމަށް ކާމިޔާބުކޮށްދިނީ ޑިފެންޑަރު ޒާން ކަރްނިޗްނިކް އެވެ. މިއީ އެޓީމުގެ ޓިމީ އެލްސްނިކް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި ސާބިއާ އިން ނަތީޖާ އެއްވަރުކުރި ލަނޑު މެޗުގެ 9⁵0 ވަނަ މިނެޓުގައި ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނިކުތް ފޯވާޑް ލޫކާ ޖޮވިޗު އެވެ.

މިއީ އެޓީމަށް ލިބުނު ކޯނަރެއްގައި އިވާން އިލިޗު ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި މިލަނޑާއެކު މެޗުގެ ކުޅުން ނިމިގެން ދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މިނަތީޖާއެކު މުބާރާތުގައި ކުޅުނު ދެމެޗުންސާބިއާއަށް އެއް ޕޮއިންޓް ލިބިފައިވާއިރު، އެޓީމު މިވަގުތު އޮތީ ގުރޫޕްގެ ފުލުގައެވެ. އަދި މިމެޗުން ލިބުނި އެއް ޕޮއިންޓާއެކު ކުޅުނު ދެ މެޗުން ސްލޮވޭނިއާއަށް ދެ ޕޮއިންޓް ލިބިފައިވާއިރު އެޓީމު މިވަގުތު އޮތީ ގުރޫޕް ސީގެ ތިންވައިގައެވެ.