ޔުއެފާ ޔޫރޯ 2024ގެ ގުރޫޕް ސީގައި މިރޭ ކުޅެވުނު ދެވަނަ މެޗުގައި އިންގްލޭންޑުން ލަނޑެއް ކާމިޔާބުކޮށް ލީޑު ހޯދާފައި ވަނިކޮށް ފަހަތުން އަރައި ލަނޑެއް ކާމިޔާބުކޮށް ޑެންމާކުން، މުބާރާތުގެ އެންމެ ފަހުގެ ރަނަރަޕް އިންގްލޭންޑް މޮޅުވިޔަނުދީ ހިފަހައްޓައިފިއެވެ.

މުބާރާތުގައި އިންގްލޭންޑުން ކުޅުމު ފުރަތަމަ މެޗުގައި 1-0 ގެ ނަތީޖާއަކުން ސާބިއާ އަތުން އެޓީމު މޮޅުވެފައިވާއިރު، ޑެންމާކުގެ ފުރަތަމަ މެޗުގައި ސްލޮވޭނިއާ ދެކޮޅަށް ކުޅުނު މެޗު ނިމުނީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ އިންގްލޭންޑުން ނެވެ. މިލަނޑު ފުރަތަމަ ހާފުގެ 18 ވަނަ މިނެޓުގައި ކާމިޔާބުކޮށްދިނީ ކެޕްޓަން ހެރީ ކޭން އެވެ.

އިންގްލޭންޑްގެ ލަނޑަށްފަހު ޑެންމާކުން އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކުރިއިރު، އެޓީމުން މެޗުގެ ނަތީޖާ އެއްވަރުކުރީ ފުރަތަމަ ހާފުގެ 34 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ މިޑްފީލްޑަރު މޯޓެން ހުލްމަންޑް އެވެ.

މިޢީ 2016 ވަނަ އަހަރުގެ ޔޫރޯގެ ގުރޫޕް ސްޓޭޖުގައި ވޭލްސްގެ ކެޕްޓަން ބޭލް އިންގްލަންޑް ކޮޅަށް ޖެހި ލަނޑަށްފަހު ޔޫރޯގެ ގުރޫޕް ސްޓޭޖު މެޗެއްގައި އެޓީމު ކޮޅަށް ވަން ފުރަތަމަ ލަނޑެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި އިންގްލޭންޑުން އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކުރި ނަމަވެސް މިހާފުގައި ޑެންމާކުގެ ޑިފެންސް ފޫއަޅުވާލުމުގައި އެޓީމަށް ކާމިޔާބު ހޯދޭ ގޮތެއް ނުވިއެވެ. އަދި މިހާފުގައި ޑެންމާކުން ވެސް ވަނީ މެޗުގެ ލީޑު ހޯދުމަށް ރަނގަޅު ފުރުސަތުތަކެއް ތަނަވަސްކޮށްފައެވެ.

ނަމަވެސް މެޗުގެ ކުޅުން ނިމިގެންދިޔައީ ދެޓީމުން ކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ. އަދި މިނަތީޖާއެކު ކުޅުނު ދެމެޗުން އިންގްލޭންޑަށް ހަތަރު ޕޮއިންޓް ލިބިފައިވާއިރު، އެޓީމު މިވަގުތު އޮތީ ގުރޫޕްގެ އެއްވަނައިގައެވެ. އަދި މިމެޗުން ލިބުނު އެއް ޕޮއިންޓާއެކު ދެމެޗުން ޑެންމާކަށް ދެ ޕޮއިންޓް ލިބިފައިވާއިރު، އެޓީމު މިވަގުތު އޮތީ ގުރޫޕް ސީގެ ދެވަނައިގައެވެ.

މީގެ އިތުރުން މިގުރޫޕްގެ ތިންވަނައިގައި އޮތް ސްލޮވޭނިއާއަށް ވެސް ދެމެޗުން ދެ ޕޮއިންޓް ލިބިފައިވާއިރު، ގުރޫޕް ސްޓޭޖުގެ ފަހު މެޗުގައި އިންގްލޭންޑާއި ސްލޮވޭނިއާ ވާދަކުރާއިރު، ޑެންމާކުން ނުކުންނާނީ ގުރޫޕް ފުލުގައި، އެއް ޕޮއިންޓާއެކު އޮތް ސާބިއާއި ދެކޮޅަށެވެ.