ޔުއެފާ ޔޫރޯ 2024 ގެ ގުރޫޕް ބީގައި އެންމެ ފަހުގެ ޗެންޕިއަން އިޓަލީ 1-0 ގެ ނަތީޖާއަކުން ބަލިކޮށް ބާކީ އެއްމެޗު އޮއްވައި ސްޕެއިން މުބާރާތުގެ ދެވަނަ ބުރުން ޖާގައެއް ކަށަވަރުކޮށްފިއެވެ.

މުބާރާތުގައި އިޓަލީ ކުޅުނު ފުރަތަމަ މެޗުގައި ވާދަވެރި ކުޅުމަކަށް ފަހު 2-1 ގެ ނަތީޖާއަކުން އެޓީމު މޮޅުވެފައިވާއިރު، ސްޕެއިންގެ ފުރަތަމަ މެޗުގައި އެޓީމުން ވަނީ ފަސޭހަކަމާއެކު 3-0 ގެ ނަތީޖާއަކުން ކްރޮއޭޝިއާ ބަލިކޮށްފައެވެ.

މރޭގެ މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ މެޗު ޑޮމިނޭޓްކުރީ ސްޕެއިން އެވެ. އެގޮތުން މިހާފުގައި އެޓީމުން ވަނީ އިޓަލީގެ ގޯލަށް ނުރައްކާތެރި ގިނަ ހަމަލާތަކެއް ފޮނުވާލާފައެވެ. އޭގެތެރޭގައި ފުރަތަމަ 10 މިނެޓް ތެރޭގައި ޕެޑްރީ އަދި ވިލިއަމްސް އަށް ލިބުނު ހުސް ދެ ފުރުސަތު ފާހަގަކޮށްލެވެއެވެ.

މީގެ އިތުރުން މިހާފުގައި ސްޕެއިންގެ ގޯލާއި އަމާޒުކޮށް އިޓަލީއަށް އެންމެ ހަމަލާއެއްވެސް ފޮނުވާލެވިފައި ނުވާއިރު، ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބުނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުވެސް ވަރުގަދަކޮށް ފެށީ ސްޕެއިނުން ނެވެ. ނަތީޖާއެއްގެ ގޮތުން ދެވަނަ ހާފުގެ 55 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑަކީ ސްޕެއިންގެ ނިކޯ ވިލިއަމްސް ގޯލު ކުރިމައްޗަށް ހުރަސްކޮށްދިން ބޯޅައެއް ދިފާއުކުރަން އުޅުމުގެ ތެރޭގައި އިޓަލީ ޑިފެންޑަރު ރިކާޑޯ ކަލަފިއޮރީ އަތުން ބައިކޮޅަށް ވަން ލަނޑެކެވެ.

މީގެ އިތުރުން މެޗު ނިމެންދަނިކޮށް ސްޕެއިނަށް ލީޑު ފުޅާކުރުމަށް ވަނީ ވަރަށް ހުސް ދެ ފުރުސަތެއް ލިބިފައެވެ. ނަމަވެސް ދެވަބަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނިކުތް އެޓީމުގެ ފޯވާޑް އަޔޯޒީ ޕެރޭޒަށް ފޮނުވާލި ދެ ހަމަލާވެސް، މިމެޗުފައި މޮޅު ކުޅުމެއްދެއްކި އިޓަލީގެ ކީޕަރު ޑޮނަރޫމާ ވަނީ ހުޝިއާރުކަމާއެކު ދިފާއުކޮށްފައެވެ. މިއާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ސްޕެއިން ކުރީގައި އޮވެގެންނެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ދެމެޗުންވެސް މޮޅުވެ ބާކީ އެއްމެޗު އޮއްވައި ސްޕެއިން ވަނީ ދެވަނަ ބުރުގެ ޖާގައެއް ކަށަވަރުކޮށްފައެވެ. އަދި މިމެޗުން ބަލިވި އިޓަލީ ކުޅުނު ދެމެޗުން އެޓީމަށް ތިން ޕޮއިންޓް ލިބިފައިވާއިރު، އެޓީމު މިވަގުތު އޮތީ ގުރޫޕްގެ ދެވަނައިގައެވެ. ތިންވަނައިގައި އޮތް އަލްބޭނިއާ އަދި ގުރޫޕް ފުލުގައި އޮތް ކްރިއޭޝިއާ އަށްވެސް ދެމެޗުން ލިބިފައި ވަނީ އެއް ޕޮއިންޓެވެ.