ޔުއެފާ ޔޫރޯ 2024 ގެ ގުރޫޕް ޑީގައި ފްރާންސް އައި ނެދަލޭންޑްސް ވާދަކުރި މެޗު ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތިޖާއަކުން ދެޓީމު އެއްވަރުވެ ގުރޫޕްގެ އެއްވަނަ މަގާމު ނެދަލޭންޑްސް އިން ދިފާއުކޮށްފިއެވެ.

މުބާރާތުގައި ނެދަލޭންޑްސް ކުޅުނު ފުރަތަމަ މެޗުގައި 2-1 ގެ ނަތީޖައަކުން ޕޮލެންޑް އަތުން މޮޅުވިއިރު، ފްރާންސްގެ ފުރަތަމަ މެޗުގައި އޮސްޓްރިއާ އަތުން އެޓީމު މޮޅުވީ 1-0 ގެ ނަތީޖާއަކުންނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗު ފެށިގެން ފުރަތަމަ މިނެޓުގައި ނެދަލޭންޑްސްގެ ޑިފެންޑަރު ޖެރެމީ ފްރިމްޕޮންގް އަށް ވަނީ މެޗުގެ ލީޑު ނެގުމަށް ވަރަށް ހުސް ފުރުސަތެއް ލިބި ބޭނުންނުކުރެވިފައެވެ. ބޯޅައާއެކު ޕެނަލްޓީ އޭރިއާ ތެރެއަށްވަދެ ތިރިތިރިން ފޮނުވާލި ހަމަލާ، ފްރާންސް ކީޕަރު މައިކް މައިގްނޮން ވަނީ ހުޝިއާރުކަމާއެކު ދިފާއުކޮށްފައެވެ.

އޭގެ ތިން މިނެޓުފަހުން ނެދަލޭންޑްސްގެ ޕެނަލްޓީ އޭރިއާ ބޭރުން ފުރާންސްގެ ކެޕްޓަން އެންޓޮއިން ގްރީޒްމަން ފޮނުވާލި ބާރު ހަމަލާއެއް ނެދަލޭންޑްސްގެ ކީޕަރު މައިކް މައިގްނޮން ދިފާއުކުރި އިރު، މެޗުގެ 14 ވަނަ މިނެޓު ތެރޭގައި ގާތްގާތުގައި އިތުރު ހުސް ދެފުރުސަތު ގްރީޒްމަން ލިބުނު ނަމަވެސް ވަނީ އެފުރުސަތުތަކުގެ ބޭނުންކުރެވޭގޮތް ނުވެފައެވެ.

މީގެއިތުރުންވެސް މިހާފުގައި ދެޓީމުންވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބުނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހަފުގައިވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައިވެސް ދެޓީމުން ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އަދި ދެވަނަ ހާފުގެ 70 ވަނަ މިނެޓުގައި ނެދަލެންޑްސްގެ މިޑްފީލްޑަރު ޒަވީ ސިމޮންސް ވަނީ ލަނޑެއް ކާމިޔާބުކޮށް އެޓީމަށް ލީޑުވެސް ހޯދައިދީފައެވެ.

ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއްކަމަށެވެ. މިއާއެކު މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބުނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މިނަތީޖާއެކު ކުޅުނު ދެމެޗުން މިދެޓީމަށް ވެސް ހަތަރު ޕޮއިންޓް ލިބިފައިވާއިރު، ލަނޑުގެ ތަފާތުން އެއްވަނާގައި އޮތީ ނެދަލޭންޑްސް އެވެ. ދެވަނާގައި ފްރާންސް އޮތްއިރު، ތިންވަނާގައި އޮތީ ދެމެޗުން ހޯދި ތިން ޕޮއިންޓާއެކު އޮސްޓްރިއާ އެވެ. އަދި މިގުރޫޕްގެ ފުލުގައި މިވަގުތު އޮތީ ކުޅުނު ދެމެޗުންވެސް ބަލިވެ ޕޮއިންޓެއް ނުލިބި އޮތް ޕޮލެންޑެވެ.