އައްޑޫ ސިޓީ ޝަރީޒް ކޮމްޕްލެކްސް ސަރަހައްދުގައި މަސްވެރިން ކުރަމުންދާ އިހުތިޖާޖް ފެށުމުގެ ކުރިންވެސް އަދި މިހާރުވެސް ސަރުކާރުން ވަރަށް ގާތުން ބަލައި، އަޑުއަހަމުންދާކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.
ވަޒީރު ޝިޔާމް މިފަދައިން ވިދާޅުވީ، މަސްވެރިންނަށް ދޭން ޖެހޭ ފައިސާ ލިބުން ލަސްވުމުގެ ސަބަބުން އައްޑޫ ސިޓީގެ ހުޅުމީދޫގައި މަސްވެރިން ކުރިއަށްގެންދާ އިހުތިޖާޖާއި ގުޅިގެން އެކްސްގައި ކުރެއްވި ޕޯސްޓެއްގައެވެ.
މިގޮތުން ވަޒީރު ޝިޔާމް ވިދާޅުވީ، މިކަމާއި ގުޅިގެން މިފްކޯ އަދި ސަރުކާރުން ކުރަމުންދާ މަސައްކަތުގެ ތަފްސީލު ހިއްސާ ކުރަމުންދާ ކަމަށެވެ.
"އައްޑޫ ފިޝަރީޒް ކޮމްޕްލެކްސް ސަރަހައްދުގައި ކުރިޔަށްދާ އިހުތިޖާޖު ފެށުމުގެ ކުރިންވެސް އަދި މިހާރުވެސް ސަރުކާރުން ދަނީ ވަރަށް ގާތުން ބަލަމުން އަޑުއަހަމުން އަދި އެކަމުގައި މިފްކޯ އަދި ސަރުކާރުން ކުރަމުންދާ މަސައްކަތުގެ ތަފްސީލުވެސް މިދަނީ ހިއްސާ ކުރަމުން."
ވަޒީރު ޝިޔާމް ވިދާޅުވިއެވެ.
މި މަހުގެ 13 ވަނަ ދުވަހުވެސް ސަރުކާރުގެ މަސްކުުންފުނި، މިފްކޯއިން މަސްވެރިންނަށް ދޫކުރަންޖެހޭ ފައިސާގެ ތެރެއިން 46 މިލިއަން ރުފިޔާ ދޫކޮށްފައިވާއިރު، އޭރު މިފްކޯއިން ބުނީ، ބާކީ ހުރި ފައިސާ ކްލިއާ ކުރުމުގެ މަސައްކަތް ވެސް އެ ކުންފުންޏާއި މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ގުޅިގެން ކުރަމުން އަންނަ ކަމަށެވެ.
Advertisement
This content is created and paid for by advertisers and does not involve Voice Journalists
