ޔުއެފާ ޔޫރޯ 2024 ގެ ގުރޫޕް އެފްގައި 3-0 ގެ ނަތީޖާއަކުން ތުރުކީ ބަލިކޮށް ބާކީ އެއްމެޗު އޮއްވައި ޕޯޗުގަލް އިން މުބާރާތުގެ ދެވަނަ ބުރުގެ ޖާގައެއް ކަށަވަރުކޮށްފިއެވެ.

މުބާރާތުގައި ޕޯޗުގަލް ކުޅުނު ފުރަތަމަ މެޗުގައި 2-1 ގެ ނަތީޖައަކުން ޗެކް ރިޕަބްލިކު އަތުން އެޓީމު މޮޅުވެފައިވާއިރު، ތުރުކީގެ ފުރަތަމަ މެޗުގައި އެޓީމުން ވަނީ 3-1 ގެ ނަތީޖައަކުން ޖޯޖިއާ ބަލިކޮށްފައެވެ.

މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ ޕޯޗުގަލް އިން މެޗު ޑޮމިނޭޓްކުރުއިރު، އެޓީމުން މެޗުގެ ލީޑު ހޯދީ ފުރަތަމަ ހާފުގެ 21 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ މިޑްފީލްޑަރު ބެނާޑޯ ސިލްވާ އެވެ. މިއީ އެޓީމުގެ ޒުވާން ފޯވާޑް ރަފައެލް ލެއާއޮ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިމެޗުގައި ޕޯޗުގަލް އިން ލީޑު ފުޅާކުރި ލަނޑަކީ މެޗުގެ 28 ވަނަ މިނެޓުގައި ތުރުކީގެ ޑިފެންޑަރު ސަމެޓް އަކޭޑިން އަތުން ބައިކޮޅަށް ވަން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ޕޯޗުގަލް ކުރީގައި އޮވެގެންނެވެ.

މެޗުގެ ދެވަނަ ހާފުގައި ތުރުކީން ބަދަލުތަކެއްގެނެސް އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކުރިއެވެ. ނަމަވެސް ޕޯޗުގަލަގެ ފަހަތުގައި އިސް ލީޑަރެއްގެ ރޯލު އަދާކުރަމުންދިޔަ ތަޖުރިބާކާރު ޑިފެންޑަރު ޕެޕޭގެ މޮޅު ކުޅުމާއެކު އެޓީމުގެ އެޓޭކުތައް ހުއްޓުވުމުގައި ޕޯޗުގަލް އިން ކާމިޔާބު ހޯދިއެވެ.

މިމެޗުގައި ޕޯޗުގަލް އިން ކާމިޔާބުކުރި ތިންވަނަ ލަނޑު ދެވަނަ ހާފުގެ 56 ވަނަ މިނެޓުގައި ކާމިޔާބުކޮށްދިނީ މިޑްފީލްޑަރު ބުރޫނޯ ފެނާންޑޭޒް އެވެ. މިއީ އެޓީމުގެ ކެޕްޓަން ކްރިސްޓިއާނޯ ރޮނާލްޑޯ ތަނަވަސްކޮށްދިން ހުސް ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު ޔުއެފާ ޔޫރަޕިއަން ޗެބްޕިއަންޝިޕްގެ ތާރީގުގައި އެންމެ ގިނަ ލަނޑުޖެހި (14) ކުޅުންތެރިއާގެ ރެކޯޑުގެ އިތުރުން، އެންމެ ގިނަ ލަނޑުޖެހުމަށް އެހީތެރިވި (8) ކުޅުންތެރިއާގެ ޝަރަފު ރޮނާލްޑޯއަށް ވަނީ ލިބިގެން ގޮސްފައެވެ.

މީގެ އިތުރުންވެސް މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓިމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 3-0 ގެ ނަތީޖާއަކުން ޕޯޗުގަލް ކުރީގައި އޮވެގެނަނެވެ.

މިނަތީޖާއެކު ކުޅުނު ދެމެޗުންވެސް މޮޅުވެ ހަ ޕޮއިންޓާއެކު ގުރޫޕްގެ އެއްވަނާގައި ޕޯޗުގަލް އޮތްއިރު، މިމެޗުން ބަލިވި ތުރުކީއަށް ދެމެޗުން ލިބުނު ތިން ޕޮއިންޓާއެކު އެޓީމު މިވަގުތު އޮތީ ގުރޫޕްގެ ދެވަނާގައެވެ.