ޖަރުމަނުގައި މިހާރު ކުރިއަށްދާ ޔުއެފާ ޔޫރޯ 2024 ގެ އީގައި ބެލްޖިއަމް އާއި ރޫމޭނިއާ ވާދަކުރި މެޗު 2-0 ގެ ނަތީޖާއަކުން ކާމިޔާބުކޮށް ބެލްޖިއަމް އިން ގުރޫޕްގެ ދެވަނައަށް ކުރިއަށްޖެހިލައިފި އެވެ.

މުބާރާތުގައި ބެލްޖިއަމް އިން ކުޅުނު ފުރަތަމަ މެޗުގައި 1-0 ގެ ނަތީޖާއަކުން ސްލޮވަކިއާ އަތުން އެޓީމު ބަލިވެފައިވާއިރު، ރޫމޭނިއާގެ ފުރަތަމަ މެޗުގައި އެޓީމުން ވަނީ ފަސޭހަކަމާއެކު 3-0 ގެ ނަތީޖާއަކުން ޔުކްރެއިން ބަލިކޮށްފައެވެ.

މިމެޗުގެ ފުރަތަމަ ހާފު ފެށިގެން ދެވަނަ މިނެޓުގައި ބެލްޖުއަމް އިން ވަނީ ލަނޑެއް ކާމިޔާބުކޮށް މެޗުގެ ކޮންޓަރޯލު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ މިޑްފީލްޑަރު ޔޫރީ ޓީލެމަންސްއެވެ. މިއީ އެޓީމިގެ ފޯވާޑް ލުކާކޫ ތަނަވަސްކޮށްދިން ފުރުސަތެއްގައި ރޫމޭނިއާގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މީގެ އިތުރުންވެސް މިހާފުގައި ދެޓީމުންވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުން ކުރެ އެއްވެސް ޓީމަކަށް އިތުރު ލަނޑެއް ކާމިޔާބުނުކުރެވި 1-0 ގެ ނަތިޖާއަކުން ބެލްޖިއަމް ކުރީގައި އޮވެގެންނެވެ.

މެޗުގެ ދެވަނަ ހާފުގައި ދެޓިމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައި ދެޓިމުންވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ.

އެގޮތުން ދެވަނަ ހާފުގެ 63 ވަނަ މިނެޓުގައި ބެލްޖިއަމްގެ ފޯވާޑް ލުކާކޫ ލަނޑެއް ކާމިޔާބުކުރި ނަމަވެސް ވީއޭއާރުން ބެލުމަށްފަހު ރެފްރީ އެއީ އޮފްސައިޑް ލަނޑެއްކަމަށެވެ. މީގެއިތުރުން މިއީ މިމުބާރާތުގައި ކުޅުނު ދެމެޗުގައި ވީއޭއާރުން ކެންސަލްކުރި ލުކާކޫގެ ތިންވަނަ ލަނޑެވެ.

މިމެޗުގައި ބެލްޖިއަމް އިން ލީޑު ފުޅާކުރި ލަނޑު ދެވަނަ ހާފުގެ 80 ވަނަ މިނެޓުގައި ކާމިޔާބުކޮށްދިނީ މިޑްފީލްޑަރު ކެވިން ޑިބްރޭނާއެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން ބެލްޖިއަމް ކުރީގައި އޮވެގެންނެވެ.

މިނަތީޖާއެކު މިގުރޫޕްގެ ކޮންމެ ޓީމަކަށްވެސް ދެމެޗު ކުޅެގެން ތިން ޕޮއިންޓް ލިބިފައިވާއިރު. ގުރޫޕްގެ އެއްވަނާގައި ލަނޑުގެ ތަފާތުން އަދިވެސް އޮތީ ރޫމޭނިއާ އެވެ. ދެވަނާގައި ބެލްޖިއަމް އޮތްއިރު، ތިންވަނައިގައި އޮތީ ސްލޮވާކިއާ އެވެ. އަދި މިގުރޫޕްގެ ފުލުގައި މިވަގުތު އޮތީ ޔުކްރެއިން އެވެ.