ޔުއެފާ ޔޫރޯ 2024 ގެ ގުރޫޕް އޭގައި މިރޭ ޖަރުމަނާއި ސްވިޒަލޭންޑް ވާދަކުރި މެޗުގެ 1-1 ގެ ނަތީޖާއަކުން ދެޓީމު އެއްވަރުވެ، ގުރޫޕްގެ އެއްވަނަ ޖަރުމަނުން ކަށަވަރުކޮށްފިއެވެ.

މުބާރާތުގެ ގުރޫޕް ސްޓޭޖުގައި ޖަރުމަނުން ކުޅުނު ފުރަތަމަ މެޗުގައި ފަސޭހަކަމާއެކު 5-1 ގެ ނަތީޖާއަކުން ސްކޮޓްލޭންޑް އަތުން އެޓީމު މޮޅުވިއިރު، ދެވަނަ މެޗުގައި ހަންގޭރީ އަތުން ޖަރުމަނު މޮޅުވީ 2-0 ގެ ނަތީޖާއަކުންނެވެ. އަދި ސްވިޒަލޭންޑްގެ ފުރަތަމަ މެޗުގައި 3-1 ގެ ނަތީޖާއަކުން ހަންގޭރީ އަތުން އެޓީމު މޮޅުވި ނަމަވެސް ދެވަނަ މެޗުގައި ސްކޮޓްލޭންޑާއި ވާދަކޮށް 1-1 ގެ ނަތީޖާއަކުން ދެޓީމު ވަނީ އެއްވަރުވެފައެވެ.

މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ ޖަރުމަނުން މެޗު ޑޮމިނޭޓްކުރިއިރު، ފުރަތަމަ ހާފުގެ 17 ވަނަ މިނެޓުގައި އެޓީމުގެ މިޑްފީލްޑަރު ރޮބަޓް އެންޑްރިޗް ލަނޑެއް ކާމިޔާބުކުރި ނަމަވެސް ވީއޭއާރުން ބެލުމަށްފަހު ރެފްރީ ވަނީ އެލަނޑު ކެންސަލްކޮށްފައެވެ.

Advertisement

އެއީ އެންޑްރިޗްއަށް އެބޯޅަ ލިބުމުގެ ކުރިން ޖަރުމަނުގެ ޒުވާން މިޑްފީލްޑަރު ޖަމާލް މުސިއާލާ ބޯޅަ ހޯދަން އުޅުމުގެތެރޭގައި ސްވިޒަލޭންޑްގެ ކުޅުންތެރިއަކަށް ފައުލްކޮށްފައި ވާތީއެވެ. ނަމަވެސް މިހާފުގައި ސްވިޒަލޭންޑުން ޖަރުމަނުގެ ގޯލާއި އަމާޒުކޮށް ފޮނުވާލި ހަމައެކަނި ހަމަލާގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑި ހޯދާފައެވެ.

މިލަނޑު ފުރަތަމަ ހާފުގެ 28 ވަނަ މިނެޓުގައި އެޓީމަށް ކާމިޔާބުކޮށްދިނީ ޒުވާން ފޯވާޑް ޑޭން އެންޑޯއޭ އެވެ. މިއީ އެޓީމުގެ ރެމޯ ފްރޫލަރ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންގޮސްފައި ވަނީ 1-0 ގެ ނަތީޖާއަކުން ސްވިޒަލޭންޑް ކުރީގައި އޮވެގެންނެވެ.

މެޗުގެ ދެވަނަ ހާފުގައި ޖަރުމަނުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މިހާފުގައި އެޓީމުން ވަނީ ސްވިޒަލޭންޑްގެ ގޯލަށް ގިނަ ހަމަލާތަކެއްޗފޮނުވާލާފައެވެ. އަދި މިހާފުގައި ސްވިޒަލޭންޑްގެ ފަރާތުން ރޭވުންތެރިކަމާއެކު މޮޅު ޑިފެންސިވް ކުޅުމެއް ފެނިގެންދިޔައިރު، ކައުންޓާ އެޓޭކުތަކުންގައި އެޓީމުން ވެސް ޖަރުމަނުގެ ގޯލަށް ނުރައްކާކޮށްފައިވެއެވެ.

އެގޮތުން ދެވަނަ ހާފުގެ 84 ވަނަ މިނެޓުގައި އެޓީމުން އިތުރު ލަނޑެއް ކާމިޔާބުކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއްކަމަށެވެ. އަދި ޖެހިގެންއައި މިނެޓުގައި ސްވިޒަލޭންޑްގެ ޕެނަލްޓީ އޭރިއާ ތެރެއިން ޖަރުމަނުގެ ފޯވާޑް ކައި ހަވަޓްޒްއަށް ލިބުނު ހުސް ފުރުސަތެއްގައި އޭނާ ބޮލުން ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ.

ޖަރުމަނުން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ދެވަނަ ހާފުގައި ބަދަލުކުޅުންތެރިއެއްގެ ގޮތުގައި ކުޅެންނުކުތް ފޯވާޑް ނިިކޮލަސް ފުލްކުރޫގް އެވެ. މިއީ އެޓީމުގެ ޑިފެންޑަރު ޑެވިޑް ރައޮމް އަރިމަތިން ހުރަސްކޮށްދިން ބޯޅައެއް ބޮލުން ގޯލުގެތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މިނަތީޖާއެކު ކުޅުނު ތިން މެޗުން ޖަރުމަނަށް ހަތް ޕޮއިންޓް ލިބިފައިވާއިރު، އެޓީމު ދެވަނަ ބުރުން ޖާގަ ހޯދީ ގުރޫޕްގެ އެއްވަނަ ޓީމުގެ ގޮތުގައެވެ. އަދި މިމެޗުން ލިބުނު އެއް ޕޮއިންޓާއެކު ކުޅުނު ތިން މެޗުން ސްވިޒަލޭންޑަށް ފަސް ޕޮއިންޓް ލިބިފައިވާއިރު، ގުރޫޕްގެ ދެވަނަ ޓީމުގެ ގޮތުގައި އެޓީމުންވެސް ވަނީ ދެވަނަ ބުރު ޔަގީންކޮށްފައެވެ.