2021 ވަނަ އަހަރުގެ އޮކްޓޫބަރު މަހުގެ 13 ވަނަ ދުވަހު ފުލުހުން ހިންގި އޮޕަރޭޝަނެއްގައި އަތުލައިގަތް 100 ކިލޯގެ މަސްތުވާތަކެތީގެ މައްސަލައިގައި ހައްޔަރު ކުރި މީހަކު މަސްތުވާތަކެތީގެ އެހެން މައްސަލައެއްގައި އަނެއްކާވެސް ހައްޔަރު ކޮށްފިއެވެ.

މިގޮތުން މަސްތުވާތަކެތީގެ ވިޔަފާރިކުރުމަށްޓަކައި އެއް ރަށުން އަނެއް ރަށަށް މަސްތުވާތަކެތި ގެންދިއުމުގެ ތުހުމަތުގައި، ޝަރީއަތް ނިމެންދެން ބަންދުކުރުމަށް ކްރިމިނަލް ކޯޓުން އަމުރުކޮށްފައިވަނީ ދ.ބަނޑިދޫ/ޕޮލަރިސް އުމުރުން 64 އަހަރުގެ މުޙައްމަދު ޙުސައިން ގެ މައްޗަށެވެ.

މުޙައްމަދު ޙުސައިންގެ މައްޗަށް މަސްތުވާތަކެތި ބޭނުންކޮށް, ގެންގުޅެ, އެ ތަކެތީގެ ވިޔަފާރިކުރާކަމުގެ ތުހުމަތު ކޮށްފައިވާއިރު، ބަންދާމެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރުކުރުމުން އެކޯޓުން ވަނީ ޝަރީއަތް ނިމެންދެން އޭނާ ބަންދުކުރުމަށް އަމުރު ކޮށްފައެވެ.

Advertisement

ކޯޓު އަމުރުގައި އޭނާގެ ހަގީގީ ހިޒާޔަތުން ޓްރެފިކިންގ މިންގަނޑަށް އަރާވަރަށް މަސްތުވާތަކެތި ފެނިފައިވާ ކަމަށާއި މަސްތުވާތަކެތީގެ ވިޔަފާރިކުރުމަށްޓަކައި އެއް ރަށުން އަނެއް ރަށަށް މަސްތުވާތަކެތި ގެންދިއުމުގެ ތުހުމަތު އޭނާގެ މައްޗަށް ކުރެވޭ ކަމަށް ފުލުހުން ހުށަހެޅި ހެކިތަކަށް ހަވާލީ ވަނީ ބުނެފައެވެ.

އދ.ބޮޑުކާށިހުރާ ކިޔާ ފަޅު ރަށެއްގައި ފޮރުވާފައި ހުއްޓާ 2021 ވަނަ އަހަރުގެ އޮކްޓޫބަރު މަހުގެ 13 ވަނަ ދުވަހު ފުލުހުން ހިންގި އޮޕަރޭޝަނެއްގައި އަތުލައިގަތް 100 ކިލޯގެ މަސްތުވާތަކެތީގެ މައްސަލައިގައި މުޙައްމަދު ޙުސައިން އާއިއެކު 10 މީހުން ހައްޔަރުކޮށް, އެމީހުންގެ މައްޗަށް ދައުވާ ކުރިއެވެ.