ސަރުކާރުން ރައްޔިތުންގެ މަޖިލީހަށް ފޮނުއްވި ސިއްޙީ ޚިދުމަތުގެ ބިލާއެކު، ސިއްޙީ ނިޒާމަށް ދިމާވެފައިވާ ގޮންޖެހުންތަކުން އަރައިގަނެ، ސިއްޙީ ނިޒާމުގެ ބޮޑެތި މައްސަލަތައް ހައްލުކުރެވިގެންދާނެ ކަމަށް ހެންވޭރު ދެކުނު ދާއިރާގެ މެންބަރު ޙުސައިން އިމްރާން ލަޠީފް ވިދާޅުވެއްޖެއެވެ.
ޢިމްރާން މިހެން ވިދާޅުވީ ސަރުކާރުގެ ފަރާތުން އައު މަޖިލީހަށް ހުށަހެޅުއްވި ފުރަތަމަ ބިލް، ސިއްހީ ޚިދުމަތުގެ ޤާނޫނަށް އިސްލާހު ގެނައުމުގެ ބިލަށް ބަހުސްކުރައްވަމުންނެވެ. މި ބިލު މަޖިލީހަށް ހުށަހެޅުއްވީވެސް އިމްރާނެވެ.
“މި ބިލު ހުށަހެޅުމުގެ ބޭނުމަކީ، ސިއްޙީ ޚިދުމަތް ދިނުމުގެ ނިޒާމާއި، ރާއްޖޭގައި ދިރިއުޅޭ ރައްޔިތުން ނަފްސާނީ ގޮތުންނާއި ޖިސްމާނީ ގޮތުން، ދުޅަހެޔޮ ސިއްހަތަކަށް ވާސިލްވެ ދެމިތިބުމަށްޓަކައި ބަލިތަކާއި ސިއްހަތަށް ލިބޭ އެހެންވެސް ގެއްލުންތަކުން އެމީހުން ދުރުވެ ތިބުމަށާއި، ރައްކާތެރިވުމަށް ބޭނުންވާ މައުލޫމާތާއި ވަސީލަތްތައް އަދި ފަރުވާ ދެމެހެއްޓެނިވި އުސޫލަކުން، އެކަށީގެންވާ ރައްކާތެރި ކަމާއި އަދި ރަނގަޅު ފެންވަރުގައި ފޯރުކޮށްދެވޭ ވަށާޖެގޭ ސިއްހީ ފަރުވާގެ ނިޒާމެއް ކަމުގައި ހެދުމަށްޓަކައި ޕްރިވެންޓިވް ކެއަރ ގެ ޚިދުމަތް އެ ނިޒާމްގެ ތެރެއިން ދެވޭނެގޮތް ހަމަޖައްސައި އެ ޚިދުމަތް ފޯރުކޮށްދެވުމުގެ މިންގަނޑުތަކާއު އުސޫލުތައް ކަނޑައެޅުމަށް” ބިލު ހުށަހަޅުއްވަމުން އިމްރާން ވިދާޅުވިއެވެ.
މިއާއެކު އިމްރާން ވިދާޅުވީ، މި ބިލަކީ ސިއްހީ ނިޒާމާއި ގުޅޭ ބިލެއް ނަމަވެސް، އެއީ ރާއްޖޭގެ ތަރައްގީއަށްވެސް މުހިންމު ބިލެއް ކަމަށެވެ. އެގޮތުން، ރާއްޖޭގައި އިތުރުވަމުންދާ އާބާދީއަކީ ސިއްހީގޮތުން ދުޅަހެޔޮ ބަޔަކަށް ހެދުމަކީ ދައުލަތުގެ ޒިންމާއެއް ކަމަށާއި، މި ބިލުގެ ސަބަބުން ރާއްޖޭގައި އިތުރުވަމުންދާ ބަލިތައް ދެނެގަނެވި، އެކަމަށް އޮތް ހައްލު ދެނެގަތުމަށް ފަސޭހަވާނެކަމަށް އޭނާ ވިދާޅުވިއެވެ.
"މި ބިލްގެ ސަބަބުން އަޅުގަނޑުމެންގެ ތެރޭގައި ޖިސްމާނީ، ނަފްސާނީ، އިންފާޓިލިޓީއާއި ކެންސަރ، ސްޓްރޯކް ހިތުގެ އަދި ކިޑްނީ ބަލިތައްފަދަ އާދަޔާ ޚިލާފަށް އިތުރުވަމުންދާ ބަލިތައް ދެނެގަނެ، އޭގެ ސަބަބުތައް ދެނެގަނެ، އެކަންކަމަށް އޮތް ހައްލު ހޯދުމަށް ވަރަށް ބޮޑު ލުއިފަސޭހައަކަށް ވެގެންދާނެ. މީގެ އިތުރުން ރާއްޖެއަށް އެތެރެވަމުންދާ ބޭހާއި ސިއްހީދާއިރާއަށް ބޭނުންވާ އިކުއިޕްމަންޓަކީ އެންމެ ރަނގަޅު ތަކެތިކަން ކަނޑައެޅިގެންދާނެ. ޖުމްލަކޮށް ދަންނަވާ ނަމަ، އަޅުގަނޑުމެންގެ ސިއްހީ ނިޒާމަށް ދިމާވެފައިވާ ބޮޑެތި މައްސަލަތަކަށް ހައްލު ހޯދަން މި ބިލުގެ ސަބަބުން ފަސޭހަވެގެންދާނެ.
މެންބަރު ޙުސައިން އިމްރާން ލަޠީފް ވިދާޅުވިއެވެ.
އެހެންކަމުން އޭނާ ވަނީ އެ ބިލު ވޭހާވެސް އަވަހަށް ތަންފީޒު ކުރެވިގެން ދިޔުމަށް އެދިވަޑައިގެންފައެވެ.
މި ބިލް މިހާރު ވަނީ މަޖިލީހަށް ބަލައިގަނެ އިޖްތިމާޢީ ކޮމިޓީއަށް ފޮނުވާފައެވެ.
Advertisement
This content is created and paid for by advertisers and does not involve Voice Journalists
