ޖަރުމަނުގައި މިހާރު ކުރިއަށްދާ ޔުއެފާ ޔޫރޯ 2024 ގައި ހޯމަ ދުވަހުގެ ރޭ ކްރޮއޭޝިއާއި އިޓަލީ ވާދަކުރި މެޗު 1-1 ގެ ނަތީޖާއަކުން އެއްވަރުވެ، ގުރޫޕްގެ ދެވަނަ ޓީމުގެ ގޮތުގައި ޗެންޕިއަން އިޓަލީ މުބާރާތުގެ ދެވަނަ ބުރުން ޖާގަ ހޯދައިފިއެވެ.

މުބާރާތުގައި ކްރޮއޭޝިއާ އިން ކުޅުނު ފުރަތަމަ މެޗުގައި 3-0 ގެ ނަތީޖާއަކުން ސްޕެއިން އަތުން އެޓީމު ބަލިވިއިރު، ދެވަނަ މެޗުގައި އަލްބޭނިއާއި ދެކޮޅަށް ކުޅުނު މެޗު ނިމުނީ 2-2 ގެ ނަތީޖާއަކުން ދެޓީމު އެއްވަރުވެފައި އޮވެގެންބެވެ. އަދި މުބާރާތުގެ އެންމެ ފަހުގެ ޗެންޕިއަން އިޓާލީގެ ފުރަތަމަ މެޗުގައި 2-1 ގެ ނަތީޖާއަކުން އަލްބޭނިއާ އަތުން އެޓީމު މޮޅުވިއިރު، ދެވަނަ މެޗުގައި ސްޕެއިން އަތުން އެޓީމު ބަލިވީ 1-0 ގެ ނަތީޖާއަކުންނެވެ.

މެޗުގެ ފުރަތަމަ ހާފުގައި ކްރޮއޭޝިއާ އިން ގިނަވަގުތު ބޯޅަ ހިފަހައްޓައިގެން ކުޅެ މެޗު ޑޮމިނޭޓްކުރި ނަމަވެސް މިހާފުގައި ލަނޑުޖަހާނެ ރަނގަޅު ފުރުސަތުތަކެއް ތަނަވަސްކުރީ އިޓަލީ އިންނެވެ. އަދި މިހާފުގައި ކްރޮއޭޝިއާ ޓީމުން އެންމެ ހުސް ފުރުސަތެއް ލިބުނީ މެޗު ފެށިގެން ފަސްވަނަ މިނެޓުގައި އެޓީމުގެ މިޑްފީލްޑަރު ލޫކާ ސުސިޗް އަށެވެ. ނަމަވެސް އޭނާ ފޮނުވާލި ބާރު ހަމަލާ އިޓަލީގެ ކީޕަރު ޑޮނަރުމާ ވަނީ ހުޝިއާރުކަމާއެކު ދިފާއުކޮށްފައެވެ.

Advertisement

މީގެ އިތުރުން މިހާފުގައި އިޓަލީ ޓީމުން އެންމެ ހުސް ފުރުސަތެއް ލިބުނީ އެޓީމުގެ ޑިފެންޑަރު އަލްސަންޑްރޯ ބަސްޓޯނީ އަށެވެ. ފުރަތަމަ ހާފުގެ 28 ވަނަ މިނެޓުގައި ކްރިއޭޝިއާގެ ޕެނަލްޓީ އޭރިއާ ތެރެއިން ލިބުނު ހުސް ފުރުސަތެއްގައި އޭނާ ބޮލުން ފޮނުވާލި ބާރު ހަމަލާ ކްރޮއޭޝިއާގެ ކީޕަރު ޑޮމިނިކް ލިވަކޮވިޗް ދިފާއުކުރިއިރު، ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބުނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި އިޓަލީން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަމަވެސް ފުރަތަމަ ހާފުގެ 54 ވަނަ މިނެޓުގައި އިޓަލީގެ ޕެނަލްޓީ އޭރިއާ ތެރެއިން އެޓީމުގެ ކުޅުންތެރިއެއްގެ އަތުފައި ބޯޅަ ޖެހުމުން ރެފްރީ ވަނީ ކްރޮއޭޝިއާއަށް ޕެނަލްޓީއެއް ދީފައެވެ. އަދި އެޓީމުގެ ކެޕްޓަން ލޫކާ މޮޑްރިޗު ކުރިއަށް ފޮނުވާލި ޕެނަލްޓީ އިޓަލީގެ ކީޕަރު ޑޮނަރޫމާ ވަނީ ހުޝިއާރުކަމާއެކު ދިފާއުކޮށްފައެވެ.

ނަމަވެސް ޖެހިގެންއައި މިނެޓުގައި މޮޑްރިޗް ވަނީ ލަނޑެއް ކާމިޔާބުކޮށް ކްރޮއޭޝިއާއަށް މެޗުގެ ލީޑު ހޯދައިދީފައެވެ. އަދި މިލަނޑާއެކު އުމުރުން 38 އަހަރުގެ މޮޑްރިޗު ވެގެންގޮސްފައިވަނީ ޔޫރޯ ފުޓްބޯޅަ މުބާރާތުގެ ތާރިޚްގައި ލަނޑުޖެހި އެންނެ ދޮށީ ކުޅުންތެރިއާއަށެވެ.

މިލަނޑާއެކު 1-0 ގެ ނަތީޖާއަކުން ކްރޮއޭޝިއާ ކުރީގައި އޮވެގެން މެޗު ނިމެންދަނިކޮށް އިޓަލީ އިން މެޗުގެ ނަތީޖާ އެއްވަރުކުރީ ދެވަނަ ހާފުގެ އިތުރުވަގުތުގެ އަށް ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރުއެއްގެ ގޮތުގައި ކުޅެންނިކުތް ޒުވާން ފޯވާޑް މަޓިއާ ޒަކަގްނީއެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މި ނަތީޖާއެކު މުބާރާތުގެ ގުރޫޕް ސްޓޭޖުގައި ކުޅުނު ތިން މެޗުން އިޓަލީއަށް ހަތަރު ޕޮއިންޓް ލިބިފައިވާއިރު، ގުރޫޕްގެ ދެވަނަ ޓީމުގެ ގޮތުގައި އެޓީމުން ވަނީ މުބާރާތުގެ ދެވަނަ ބުރުގެ ޖާގައެއް ކަށަވަރުކޮށްފިއެވެ. އަދި މިމެޗުން ލިބުނު އެއް ޕޮއިންޓާއެކު ތިން މެޗުން ލިބުނު ދެ ޕޮއިންޓާއެކު ކްރޮއޭޝިއާ މިވަގުތު އޮތީ ގުރޫޕްގެ ތިންވައިގައެވެ.