ރާއްޖޭގެ މަސްވެރިކަން ހަލާކު ކުރީ އެމްޑީޕީ ސަރުކާރުން ކަމަށް ކުރީގެ ރައީސް ޔާމީން އަބްދުލް ގައްޔޫމް ވިދާޅުވެއްޖެއެވެ. 

ރޭ ޕީއެންއެފްގެ ފްރޮންޓް އޮފީހުގައި ބޭއްވި ޖަލްސާގައި ވާހަކަ ދައްކަވަމުން ޔާމީން ވިދާޅުވީ، މަސްވެރިކަމަކީ ދިވެހި ރާއްޖޭގެ ލޭނާރު ކަމަށާ، މަސްވެރިންގެ ޚިދުމަތުގެ އަގުވަޒަން ކުރަން ޖެހޭ ކަމަށެވެ. އަދި މަސްވެރިން ދިވެހި ރާއްޖޭގައި ތިބެންޖެހޭ ކަމަށެވެ. އެހެންކަމުން، މަސްވެރިން ބާނާ މަސް ގަތުމަށްފަހު އެއަށްވާ ފައިސާ ދައްކަންޖެހޭ ކަމަށް ޔާމީން ވިދާޅުވިއެވެ. 

މިއާއެކު، އެމްޑީޕީން މަސްވެރިންގެ ހައްގުގައި ކުރާ ކަންކަމާއި އެނޫންވެސް އިދިކޮޅު ޕާޓީގެ ހައިސިއްޔަތުން ކުރަމުންދާ ކަންކަމަށް ޕީއެންއެފްއިން ތާއީދު ކުރަންތޯ ނުވަތަ ނޫންތޯ ކުރެވުނު ސުވާލަކަށް ޖަވާބު ދެއްވަމުން ރައީސް ޔާމީން ވަނީ ޕީއެންއެފްއިން އެމްޑީޕީއަށް ތާއީދު ނުކުރާނެ ކަމަށާ، އެ ދެ ޕާޓީއަކީ އެއް ފިކުރެއްގެ ޕާޓީއެއް ނޫން ކަމަށް ވިދާޅުވެފައެވެ. 

އެހެން ނަމަވެސް، ރައްޔިތުންގެ ހައްގުގައި މަޖިލިސް ތެރެއިން، އެމްޑީޕީން ކުރަމުން އަންނަ ކަންކަމަށް ތާއީދު ކުރައްވާނެ ކަމަށް ޔާމީން ވިދާޫވިއެވެ. 

ކަންމިހެން ހުރި ނަމަވެސް، ޔާމީން ވަނީ އެމްޑީޕީގެ ވެރިކަމުގައި ރާއްޖޭގެ އިގްތިޞާދު “ފުނޑާލައި” މަސްވެރިކަން ހަލާކުކޮށްލި ކަމަށް ވިދާޅުވެ އެޕާޓީއަށް ވަރަށް ބޮޑަށް ފާޑުވިދާޅުވެފައެވެ.

ޔާމީން ވިދާޅުވީ، އެމްޑީޕީން ރާއްޖޭގެ އިގްތިޞާދު ފުނޑާލާފައި ވަނީ ރޭވުމެއްގެ ތެރެއިން ކަމަށެވެ.