ޔުއެފާ ޔޫރޯ 2024 ގެ ގުރޫޕް ސީގައި އިންގްލޭންޑާއި ސްލޮވޭނިއާ ވާދަކުރި މެޗު 1-1 ގެ ނަތީޖާއަކުން ދެޓީމު އެއްވަރުވެ، ބޮޑު މުބާރާތެއްގެ ނޮކައުޓް ބުރުން ފުރަތަމަ ފަހަރަށް ސްލޮވޭނިއާ އިން ޖާގަ ހޯދައިފިއެވެ.

މުބާރާތުގައި އިންގްލޭންޑް ކުޅުނު ފުރަތަމަ މެޗުގައި ސާބިއާ އަތުން 1-0 ގެ ނަތީޖާއަކުން އެޓީމު މޮޅުވި ނަމަވެސް، ޑެންމާކާއި ދެކޮޅަށް ކުޅުނު ދެވަނަ މެޗު ނިމުނީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ. އަދި ސްލޮވޭނިއާ އިން މުބާރަތުގައި ކުޅުނު ފުރަތަމަ ދެމެޗުގައި ޑެންމާކް އަދި ސާބިއާ ދެކޮޅަށް ކުޅުނު ދެމެޗު ވެސް ނިމުނީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ފުރަތަމަ ހާފުގައި އިންގްލޭންޑުން ގިނަވަގުތު ބޯޅަ ހިފަހައްޓައިގެ ކުޅެ މެޗު ޑޮމިނޭޓްކުރިއިރު، މެޗުގެ 20 ވަނަ މިނެޓުގައި އެޓީމުގެ ފޯވާޑް ބަކަޔޯ ސަކާ އެޓީމަށް ލަނޑެއްވެސް ކާމިޔާބުކޮށްދިނެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

Advertisement

މީގެ އިތުރުން ފުރަތަމަ ހާފުގައި ލަނޑުޖަހާނެ މާ ރަނގަޅު ހުސް ފުރުސަތުތަކެއް ދެޓީމުން ކުރެ އެއްވެސް ޓީމަކަށް ތަނަވަސްކުރެވިފައި ނުވާއިރު، ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި އިންގްލޭންޑުން ވަނީ ބަދަލުތަކަކާއެކު ލަނޑެއްޖެހޭތޯ ވަރަށް މަސައްކަތްކޮށްފައެވެ. ނަމަވެސް އެޓީމުގެ އެޓޭކުތައް ހުއްޓުވުމުގައި ސްލޮވޭނިއާ އިން ވަނީ ރޭވުންތެރިކަމާއެކު މޮޅު ދިފާއީ ކުޅުމެއް ދައްކަދީފައެވެ. މިއާއެކު މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މިނަތީޖާއެކު މުބާރާތުގެ ގުރޫޕް ސްޓޭޖުގައި ކުޅުނު ތިން މެޗުން ލިބުނު ފަސް ޕޮއިންޓާއެކު އިންގްލޭންޑް ދެވަނަ ބުރުން ޖާގަ ހޯދީ ގުރޫޕްގެ އެއްވަނަ ޓީމުގެ ގޮތުގައެވެ. އަދި މިމެޗުން ލިބުނު އެއް ޕޮއިންޓާއެކު ކުޅުނު ތިން މެޗު ލިބުނު ތިން ޕޮއިންޓާއެކު ސްލޮވޭނިއާއަށް މުބާރާތުގެ ދެވަނަ ބުރުން ޖާގަ ލިބިފައިވަނީ، ހަ ގުރޫޕުން ތިންވަނަ ހޯދި ޓީމުތަކުގެ ތެރެއިން އެންމެ ރަނގަޅު ނަތީޖާ ހޯދި ހަތަރު ޓީމުގެ ތެރޭގައި ހިމެނިގެންނެވެ.